Agjencia Kosovare e Privatizimit ka përfunduar me sukses një proces gjithëpërfshirës të verifikimit dhe identifikimit të aseteve të ndërmarrjeve shoqërore nën administrimin e saj, duke zbuluar 461 asete të reja me një sipërfaqe totale prej 396 hektarësh, të cilat më parë nuk ishin në listat zyrtare të AKP-së.
AKP njofton se ky proces, i realizuar në bashkëpunim të ngushtë me Agjencinë Kadastrale të Kosovës dhe i mbështetur në të dhënat zyrtare kadastrale të vitit 2024, synonte evidentimin dhe saktësimin e të drejtave pronësore mbi asetet e ndërmarrjeve shoqërore.
Tutje thuhet se falë këtij procesi, një numër i konsiderueshëm asetesh janë rikthyer në administrimin ligjor të AKP-së, duke përforcuar menaxhimin dhe mbrojtjen e pronës shoqërore.
“Në vijim, AKP planifikon të verifikojë të dhënat kadastrale nga viti 2000, për të identifikuar asete që mund të jenë tjetërsuar pa dijeninë e Agjencisë, për të vlerësuar ligjshmërinë e ndryshimeve pronësore pas vitit 2000 dhe për të marrë masa për kthimin e pronës në rast të transferimeve të paligjshme”, thuhet në njoftim.
AKP thekson se kjo arritje nënvizon angazhimin e AKP-së për transparencë, ligjshmëri dhe mbrojtje të pronës shoqërore, duke kontribuar në zhvillimin ekonomik dhe interesin publik të Republikës së Kosovës.
