Policia e Kosovës ka ndërmarrë një operacion të gjerë sot, duke arrestuar tre persona dhe duke sekuestruar një sasi të madhe armësh dhe municioni në disa lokacione në Klinë dhe Prishtinë.
Në koordinim me Prokurorinë Themelore në Pejë dhe mbështetur nga njësitë e ndryshme policore, Drejtoria për Hetimin e Krimit të Organizuar dhe Krimeve të Rënda kreu kontrolle në tri lokacione në Klinë dhe një në Prishtinë.
Sipas policisë, tre personat janë arrestuar si të dyshuar për veprën penale ‘Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse”.
“Gjatë kontrollit të realizuar si dëshmi materiale janë sekuestruar një armë snajper, disa pistoleta me karikatorë dhe fishekë, një automatik AK-47 me dy karikatorë, pushkë gjuetie, pushkë ajrore, si dhe fishekë të ndryshëm. Përveç armëve, policia mori edhe telefona mobile, një thikë, shpatë të arteve marciale dhe një antiplumb. Disa nga armët kanë rezultuar të pajisura me leje, por janë sekuestruar për verifikime të mëtejshme”, thuhet në njoftim.
Pas intervistimit, njëri nga të dyshuarit është ndaluar për 48 orë, ndërsa dy të tjerët janë liruar në procedurë të rregullt.
