Besim DYBELI
Shëngjini, që “fle” rrëzë vargmaleve, zgjohet nën qetësinë e detit pa dallgë e diellit, që nuk të djeg. Ky mbetet rituali veror me mijëra pushues vendas e të huaj. Shumica e pushuesve duken njerëz të thjeshtë, me fytyrë të qetë, familjar e tepër socialë. Statistikat zyrtare i regjistrojnë si turistë nga jashtë. Çfar paradoksi! Po, ata janë në tokën amë. Shqiptarë të Kosovës, Maqedonisë e më gjërë. Nuk janë vëllezërit tanë?! I thuhet vëllait, “mik”, që vjen në shtëpinë e tij?! Rëndom në media i etiketojnë si “turistë” të kategorisë së tretë e që i ulin pijarin turizmit elitar në Shqipëri. Ata janë pushues të shumtë, tepër të thjeshtë e pa shumë pretendime. Po e shohim ne propagandën e turistëve elitarë nga jashtë. Sikurse po i vuajmë çmimet mbi tavan. Pa le, shërbimin! Këta “turistë”, që kanë tejmbushur Shëngjinin anë e anë, nuk kanë ardhur këtu me mjete luksoze. Apo, edhe me qen e mace kokëjashtë nëpër makina tepër të shtrenjta. Kanë udhëtuar nga Kosova e Maqedonia me autobusë e makina familjare. Siç thuhet nga këto anë,- me kerr! Por këta janë “turistë”, që “pushtojnë” Shëngjinin, nga qershori e gjer në fund të shtatorit. Këto ditë shezlonët janë pothuaj ngjitur me njeri-tjetrin. Aq shumë pushues shqiptar përtej kufijve shtetëror. Nuk janë pak për ripërtëritjen e biznesit në raport me investimet e shumta në këtë zonë. Dhe shëngjinasit kanë ditur t’i presin e respektojnë. U ndala në një nga lokalet turistikë buzë detit me ujë si kristal. Me një emër të thjeshtë e kanë pagëzuar. “Rana”, kështu quhet. Djem e vajza, që punojnë më dy turne. Ka shumë pushues këtu. Pastër, mirë e lirë. Shërbimi plot kulturë e gatimet tepër cilësore. Prodhime te zonës e detit, që përgatiten në çast. Jeni kuriozë, sa kushton një drekë? Po jua them. Pesë persona më të gjitha asortimentet detare e ato të zonës, vetëm. 110 mijë lekë të vjetra! Shezlloni, vetëm 10 mijë lekë të vjetra! Ka më lirë? Jo. Ja, pra, pse vëllezërit tanë shqiptarë jashtë kufijve, nuk kanë “frikë ” të pushojnë këtu. Po ashtu edhe nga shumë trevat të Shqipërisë. Ky është turizmi, që duam. Përndryshe, hotelet e restorantet do të mbulohen nga merimanga. E, shqiptarët e Shqipërisë do të prontojnë pushimet jashtë vendit që në dimër. Është koha tu themi, “faleminderit” vëllezërve tanë shqiptarë, që nuk kanë “tradhëtuar” tokën amë, edhe për të pushuar.
