Fondi i Kosovës për Efiçiencë të Energjisë ka përuruar sot renovimin e katër ndërtesave shumëbanesore sociale në Komunën e Prishtinës, në kuadër të projektit për zbatimin e masave për efiçiencë të energjisë.
Kryeministri në detyrë, Albin Kurti, ka theksuar se nga këto punime kanë përfituar 200 familje me gjithsej 790 banorë, me një investim prej 1.24 milionë euro, nga të cilat 90% janë financuar nga Bashkimi Evropian.
“Këto janë banesa për 200 familje, apo gjithsej 790 banorë. Pas përfundimit të këtyre renovimeve, banorët sivjet do të kenë dimra më të ngrohtë dhe më të sigurt. Investimi i përgjithshëm është 1.24 milionë euro, 90% nga BE-ja. Renovimi përfshin izolimin e kulmeve dhe mureve, ndërrimin e dyerve dhe dritareve, si dhe vendosjen e sistemeve të reja të ngrohjes dhe masave të sigurisë. Ky projekt është pjesë e një programi më të gjerë prej 6 milionë euro për 28 ndërtesa sociale në 13 komuna, që përfshin 889 familje. Për këtë kemi planifikuar që gjatë qeverisjes së ardhshme të renovohen edhe 400 objekte anembanë Kosovës”, ka deklaruar ai.
Ministrja në detyrë e Ekonomisë, Artane Rizvanolli, ka deklaruar se katër ndërtesat e Prishtinës janë pjesë e një grupi prej 28 ndërtesash në gjithë Kosovën, shumica e të cilave pritet të përfundojnë para dimrit.
“Ndërtesat që po përurojmë sot në Prishtinë janë 4 nga 28 në të gjithë Kosovën, dhe shumica dërrmuese – përveç atyre në Prizren që kanë filluar me vonesë do të përfundojnë para dimrit të këtij viti. Kjo është pjesë e një pakoje më të madhe prej 75 milionë euro që e kemi përfituar nga BE-ja”, ka theksuar ajo.
Ndërkohë, Alessandro Bianciardi nga Zyra e BE-së në Kosovë theksoi se vetëm për dy ndërtesa sociale në Prishtinë janë investuar rreth 650 mijë euro, nga të cilat 90% janë financuar nga BE-ja dhe 10% nga Komuna e Prishtinës. Ai nënvizoi se projekti ka mundësuar izolim termik, dritare të reja me efiçiencë energjetike, sistem ndriçimi, përmirësim të hapësirave të përbashkëta dhe zëvendësim të derës hyrëse.
“Projekti për këto dy ndërtesa sociale në Prishtinë, të cilat u financuan përmes paketave të mbështetjes energjetike të BE-së, ka kushtuar rreth 650 mijë euro. 100 familje në nevojë sociale kanë përfituar nga ky investim. Investimi është financuar 90% nga Bashkimi Evropian dhe 10% nga Komuna e Prishtinës, dhe është zbatuar nga Fondi për Efiçiencë të Energjisë i Kosovës. Ky projekt është pjesë e paketës së mbështetjes energjetike të hartuar në bashkëpunim me Qeverinë dhe Fondin për Efiçiencë në fillim të vitit 2023”, ka theksuar ai.
