Presidenti i SHBA-së, Donald Trump, raportoi në rrjetin e tij social Truth Social se pati një “bisedë të mrekullueshme” me Alexander Lukashenkon. Sipas Trump, gjatë bisedës ai diskutoi lirimin e 1,300 të burgosurve politikë bjellorusë.
“Qëllimi i telefonatës ishte ta falënderoja për lirimin e 16 të burgosurve. Po diskutojmë gjithashtu lirimin e 1,300 të burgosurve të tjerë. Biseda jonë ishte shumë e mirë. Diskutuam shumë tema, përfshirë vizitën e Presidentit [Vladimir] Putin në Alaska. Pres me padurim të takohem me Presidentin Lukashenko në të ardhmen”, shkroi Trump .
Presidenti i SHBA-së nuk specifikoi se për cilët 16 të burgosur po fliste. Shërbimi për shtyp i Lukashenkos raportoi për faljen e 16 të burgosurve në korrik. Emrat nuk u zbuluan as në atë kohë.
Agjencia bjelloruse e lajmeve BelTA raporton se gjatë bisedës, Trump dhe Lukashenko “diskutuan çështje mbi axhendën dypalëshe, temat rajonale dhe situatën në pikat e nxehta, përfshirë Ukrainën”. Lukashenko e ftoi Trumpin të vizitojë Minskun.
Shërbimi për shtyp i Lukashenkos sqaroi se biseda u zhvillua para fluturimit të Trump për në Alaska për bisedime me Putinin.
