Nënkryetarja e PDK-së, Vlora Çitaku, ka bërë thirrje për vëmendje lidhur me paralajmërimin për shkyçjen nga rrjeti i energjisë elektrike të rreth 1400 bizneseve, kryesisht prodhues.
Në një postim në Facebook, Çitaku tha se kjo situatë po rrezikon seriozisht mijëra vende pune dhe të ardhurat e punëtorëve dhe familjeve të tyre.
Çitaku kritikoi vendimet e Zyrës së Rregullatorit për Energji (ZRRE) dhe Qeverisë, duke i cilësuar si masë që po dëmton sektorin privat dhe ekonominë e vendit.
Ajo theksoi se qytetarët janë të lodhur nga çmimet e larta të energjisë dhe produkteve bazë, ndërsa tani përballen edhe me rrezikun e papunësisë masive.
“Ky është vazhdim i përpjekjeve të qëllimshme për të shkatërruar sektorin privat, siç kanë bërë edhe me institucionet e pavarura. Kjo mendësi totalitare i përket shekullit të kaluar, dhe shoqëria jonë nuk do ta tolejrojë,” tha Çitaku.
