Federata e Futbollit e Kosovës ka vënë si prioritet kryesor për edicionin e ri të garave rikthimin e tifozëve në tribunat e stadiumeve.
Kryetari i FFK-së, Agim Ademi, e ka parë të rëndësishme për ndeshjet praninë e tifozëve.
“Synim i përbashkët i këtij edicioni duhet të jetë rritja e shikueshmërisë. Futbolli luhet për tifozët. Ata i japin atij ngjyrat e spektaklit. Kur zëri i tyre jehonë në stadiume ndeshjet janë më madhështore, motivi i futbollistëve maksimal dhe loja në fushën e gjelbër në një nivel tjetër”, është shprehur Ademi.
Ai ka theksuar se FFK është plotësisht e përgatitur për një kampionat të rregullt dhe transparent, duke prezantuar edhe platformën digjitale “My FFK”, që do të bëjë të qasshme të gjitha të dhënat nga ndeshjet për klubet, zyrtarët dhe publikun.
“Kjo fundjavë shënon fillimin e edicionit të ri të garave të futbollit në vendin tonë. FFK me të gjitha organet e saj i ka bërë përgatitjet e duhura për një kampionat sa më të mbarë, me lojë të ndershme dhe garë të rregullt…Me këtë sistem e rrisim tutje nivelin e organizimit dhe transparencën në të gjitha ndeshjet që zhvillohen nën ombrellën e Federatës”, ka thënë ai.
Ademi ka shtuar se edicioni i ri premton rivalitet të madh në Albi Mall Superligë dhe në Raiffeisen Ligën e Parë, duke theksuar se garat do të sjellin emocione të shumta mes skuadrave me traditë dhe atyre që duan të bëjnë histori.
“Qoftë një edicion i suksesshëm, e ju priftë e mbara”, ka uruar Ademi.
