Agjencia e Menaxhimit Emergjent (AME) ka njoftuar sot se janë regjistruar gjithsej 87 vatra zjarri në tërë vendin. Sipas raportit të datës 17 gusht, nga këto vatra, 79 janë lokalizuar, ndërsa 8 vazhdojnë të jenë aktive.
“Sipas të dhënave të pranuara sot, janë regjistruar gjithsej 87 vatra zjarri në vend. Prej tyre, 8 vazhdojnë të jenë aktive, ndërsa 79 janë lokalizuar,” thuhet në njoftimin e AME-së.
Agjencia thekson se menaxhimi i situatës po bëhet në koordinim të plotë me Njësitë Profesionale të Zjarrfikjes dhe Shpëtimit.
AME u bën apel të gjithë qytetarëve “që të tregojnë kujdes të shtuar, të shmangin çdo veprim që mund të shkaktojë zjarr dhe të raportojnë menjëherë çdo vatër në numrat emergjentë 112, 193 dhe 192.”
AME ka shprehur mirënjohje për angazhimin në terren të pjesëtarëve të Njësive Profesionale të Zjarrfikjes dhe Shpëtimit. “Agjencia shpreh mirënjohje për përkushtimin e Pjestarve të Njesive Profesionale të Zjarrfikjes dhe Shpëtimit për angazhimin e tyre ne teren,” thuhet në njoftim.
