Ish-gjyqtari i Gjykatës Kushtetuese, Kadri Kryeziu, ka komentuar Aktgjykimin e 18 gushtit 2025, duke e cilësuar atë si një “arrnim kushtetues”, që megjithatë mund të kryejë punë në zhbllokimin e situatës politike në vend.
Sipas Kryeziut, Gjykata ka qenë e kujdesshme në përpjekjen për të arsyetuar veten, pse në Aktgjykimin paraprak të 26 qershorit nuk kishte përcaktuar qartë që “praktikat e deritanishme parlamentare” nënkuptojnë votim të hapur.
Ai thekson se një sqarim i tillë më herët do të kishte shmangur dramat politike që pasuan për gjashtë javë me radhë.
“Sado ka tentuar me shto miell e shto ujë, Gjykata nuk ia ka dalë ta amnistojë veten nga bashkëpërgjegjësia për situatën e krijuar”, ka vlerësuar Kryeziu.
Ai shton se Gjykata nuk e ka përjashtuar mundësinë e votimit të fshehtë, por me gjuhë të kujdesshme e ka orientuar procedurën drejt votimit të hapur, në mungesë të konsensusit për një alternativë tjetër. Sipas tij, kjo është një qasje e qëndrueshme dhe logjike, brenda kufijve të kompetencave kushtetuese.
Lidhur me kufizimin e të drejtës për të nominuar të njëjtin emër për kryetar Kuvendi deri në tre herë, ai e konsideron këtë si juridikisht të dobët, por e pranon si një “gjetje të qëllimmirë” që synon të mbajë balancë mes palëve.
“Është një harrnim juridik qëllimmirë që synon të qëndrojë në mes të pozicioneve të kundërta të palëve”, thekson ai.
Kryeziu gjithashtu thekson se përgjegjësia për moskonstituimin e Kuvendit është e të gjithë deputetëve, dhe se rruga procedurale është tashmë e qartë. Ai shpjegon qartë hapat që duhet të ndërmerren, duke përfshirë mundësinë e tri përpjekjeve për të votuar të njëjtin kandidat për kryetar, e pastaj ndërrimin e emrit nëse dështohet.
Në fund, ai shton se aktgjykimi është përfundimtar dhe i detyrueshëm për zbatim.
“Palët kanë të drejtë të pajtohen apo jo me të, por në praktikë kjo çështje është e mbyllur. Rrjedhimisht, pres që të gjitha partitë politike ta zbatojnë në përpikëri,” thekson Kryeziu.
