Policia e Kosovës, përmes njësive kufitare dhe operative, ka parandaluar dy raste të ndara të kontrabandimit me mallra, si rezultat i kontrolleve të shtuara përgjatë zonave kufitare, në bashkëpunim me Doganën e Kosovës.
Më 17 gusht 2025, Njësia e Taskforcës Lindje, e përbërë nga Policia dhe Dogana e Kosovës, ka identifikuar një automjet të dyshuar me targa vendore në zonën kufitare ndërmjet Republikës së Maqedonisë së Veriut dhe Republikës së Kosovës.
Gjatë ndalimit dhe kontrollit të automjetit, janë gjetur mallra të ndryshme të kontrabanduara si tekstil, pajisje elektronike, veshmbathje sportive, bizhuteri, etj.
Mallrat, me vlerë mbi 2,000 euro, po transportoheshin në mënyrë të kundërligjshme dhe pa dokumentacion përkatës. Automjeti, i dyshuari dhe mallrat janë shoqëruar në terminalin doganor, ndërsa rasti po trajtohet nga njësitet kompetente të Doganës së Kosovës, ka njoftuar Policia e Kosovës.
Po më 17 gusht 2025, njësitet policore të DRPK-Lindje SPMK–Muqivërcë, bazuar në informacione operative, kanë ndaluar një tentativë për kontrabandë në fshatin Lisock – Kamenicë, nga territori i Republikës së Serbisë në drejtim të Kosovës.
Gjatë kontrollit të automjetit të dyshuar me targa vendore, janë gjetur 1500 kg speca, për të cilët i dyshuari nuk posedonte dokumentacion përkatës. Malli është konfiskuar dhe dorëzuar në Doganën e Kosovës, ndërsa rasti është iniciuar në koordinim me prokurorin kujdestar.
Policia e Kosovës thekson se mbetet e përkushtuar në parandalimin dhe luftimin e të gjitha formave të kriminalitetit, veçanërisht kontrabandës.
