Banorët e fshatrave Grazhdanik, Kobaj dhe Nashec të Prizrenit ngrysën ditën e tetë pa rrymë. Pavarësisht se edhe sot u protestua para zyrave të KEDS-it, një person u arrestua nga policia, për shkak se pengoi vendosjen e një shtylle tensioni të lartë në fshatin Kobaj.
Në fshatin Kobaj të Prizrenit, policia ka arrestuar një person, nën dyshimin se ka penguar vendosjen e një shtylle të tensionit të lartë, e cila është paraparë të rikthejë furnizimin me energji elektrike për tri fshatra, që tash e tetë ditë kanë kaluar ditë e net pa rrymë. Ekipit të KEK-ut i ka dalë në ndihmë edhe njësia speciale e policisë.
“Ne jemi në asistim të ekipeve të KEDS-it në Prizren për zëvendësimin e dy shtyllave të tensionit të lartë, të cilat paraqesin rrezik për banorët. Po ashtu, tri fshatra janë pa rrymë, ndërsa ne jemi njësi që po asistojmë këtu”, tha Sami Hoti, rreshter, udhëheqës i ekipit të Njësisë Speciale në Prizren.
Banorët e fshatrave Grazhdanik, Kobaj dhe një pjese të fshatit Nashec të Prizrenit, pas bllokimit të rrugëve të fshatrave, sot protestuan edhe para zyrave të KEDS-it, duke kërkuar një zgjidhje sa më të shpejtë për furnizimin me rrymë.
“Problemi është te KEDS-i, ata duhet ta rregullojnë këtë problem. Pse ka ardhur kështu, ata e dinë, por ne nuk kemi rrymë. Fshati komplet nuk ka rrymë, lagjet e tëra janë pa energji, plus edhe disa lagje të tjera që janë të lidhura me atë linjë nuk kanë rrymë”, tha Shukri Quni, kryetar i bashkësisë së fshatit.
“Situata është alarmante, jo e vështirë, sepse e vështirë mund të jetë një ditë a dy, por sot është alarmante. Ne sot jemi këtu në protestë, kemi qenë edhe dje. Deri më sot ne si organizatorë e kemi mbajtur nën kontroll protestën, por siç po e shohim, sipas banorëve, nga sot është e pamundur ta mbajmë më nën kontroll” tha Andrian Boqaj, banor
“Deri sot kemi qenë paqësorë, por nesër nuk mundemi më ta mbajmë kështu, sepse po na humb durimi. Ju lutem, na ndihmoni. Ne i kemi sytë kah ju dhe kah policia. Nëse ka shtet, ne nuk dimë ku tjetër të ankohemi”, tha Vitor Kala, banor.
“Ka edhe alternativë tjetër, nga rruga kryesore në Grazhdanik. Ata e kanë krejt hapur edhe andej, edhe këndej, ku me marrë tensionin e lartë. Kanë ardhur specialistët, por tash nuk dimë më asgjë”, tha Xhelal Osmanaj, banor.
Pavarësisht kundërshtimeve të disa banorëve, ekipet teknike të KEDS-it arritën të vendosin një shtyllë të tensionit të lartë në Kobaj. Banorët janë në pritje të tejkalimit të gjendjes, e cila tashmë për më shumë se një javë, përveç vështirësive të përditshme, u ka shkaktuar edhe dëme në ekonominë familjare. Neglizhimi i këtij problemi, sipas tyre, do të rezultojë në protesta të reja.
