MOSKJA nuk po heq dorë nga kërkesat e saj për ato që i konsideron garanci të pranueshme sigurie për Ukrainën, konfirmoi Ministri i Jashtëm rus Sergei Lavrov. Deklaratat e tij minuan shpresat për çdo përparim drejt përfundimit të luftës që kishte lindur pas takimit të Presidentit rus Vladimir Putin dhe Presidentit të SHBA-së Donald Trump në Alaska të premten e kaluar, raporton Politico .
Komentet e Lavrovit konfirmojnë edhe një herë se Kremlini nuk i ka zbutur pikëpamjet e tij maksimaliste ndaj Ukrainës: ai kërkon që ajo të bëhet një shtet neutral dhe i cunguar, të zvogëlojë në mënyrë drastike ushtrinë e saj dhe të braktisë aspiratat e saj për anëtarësim në NATO.
E drejta e vetos si kusht kyç
“Moska nuk do të bjerë dakord me garancitë kolektive të sigurisë të dakordësuara pa Rusinë… Rusia do të pranojë nëse garancitë e sigurisë i ofrohen Ukrainës në baza të barabarta me pjesëmarrjen e vendeve si Kina, Shtetet e Bashkuara, Mbretëria e Bashkuar dhe Franca”, tha Lavrov në një konferencë për shtyp pas një takimi me ministrin e jashtëm jordanez.
Ideja që Pekini dhe Moska kanë ndonjë ndikim mbi funksionimin e garancive të sigurisë për Ukrainën është plotësisht e papranueshme për aleatët perëndimorë, edhe pse ata përpiqen të hartojnë një plan për të mbrojtur Ukrainën pas një armëpushimi ose marrëveshjeje paqeje të mundshme.
Në një provë të mëtejshme të kokëfortësisë së Kremlinit në refuzimin për të ndërmarrë hapa për t’i dhënë fund pushtimit që filloi në shkurt 2022, një takim i propozuar midis Putinit dhe Presidentit ukrainas Volodymyr Zelensky mbetet një mundësi e largët, duke gjykuar nga komentet që Lavrov bëri më parë këtë javë.
Kthim te negociatat e dështuara
Lavrov të mërkurën iu rikthye një koncepti të propozuar gjatë bisedimeve të paqes në Stamboll në prill 2022, i cili përfshinte një koalicion të vendeve garantuese të ngjashme me NATO-n. Kjo ide dështoi sepse Moska këmbënguli në një klauzolë unanime, sipas së cilës të gjitha vendet, përfshirë Rusinë, do të duhej të miratonin aktivizimin e garancive.
“Jam i bindur se në Perëndim, mbi të gjitha në Shtetet e Bashkuara, e kuptojnë në mënyrë të përsosur se diskutimi i çështjes së sigurisë pa Federatën Ruse është një utopi, një rrugë që nuk çon askund”, tha Lavrov. Kryediplomati i Putinit kritikoi gjithashtu kryediplomaten e BE-së, Kaja Kallas, një avokate e zjarrtë e një politike të ashpër ndaj Rusisë, deklaratat e së cilës ai i quajti “degradim i metodave të politikës së jashtme”.
Skepticizmi ndaj udhëheqësve evropianë
Nga ana tjetër, Trump, i cili i shpalli takimet e fundit me Putinin, pastaj Zelenskyn dhe udhëheqësit evropianë si të suksesshme, i premtoi Kievit mbrojtje të NATO-s “si ajo e Nenit 5”, por pa asnjë detaj. Ai më vonë shtoi se trupat amerikane nuk do të vendosen në terren në Ukrainë.
Megjithatë, udhëheqësit evropianë nuk besojnë se Putini është i sinqertë në lidhje me arritjen e një marrëveshjeje paqeje, dhe deklaratat e fundit të Sergei Lavrov vetëm sa e konfirmojnë këtë teori.
