Policia e Kosovës ka dhënë detaje për aksidentin e rëndë të trafikut që ndodhi mëngjesin e sotëm, rreth orës 06:10, në magjistralen Pejë–Prishtinë, në fshatin Dollc të Klinës. Si pasojë e këtij aksidenti, një person ka humbur jetën, ndërsa pesë të tjerë kanë pësuar lëndime trupore.
Sipas njoftimit të policisë, në aksident janë përfshirë një autobus dhe një veturë me targa vendore.
“Deri te ky aksident dyshohet se ka ardhur derisa drejtuesi i veturës ishte duke qarkulluar nё drejtimin Prishtinё–Pejё, ku me tё arritur në fshatin Dollc, duke mos iu pёrshtatur shpejtёsisё dhe kushteve tё rrugёs, humb kontrollin mbi automjet dhe kalon nё shiritin pёr lëvizje nga ana e kundёrt dhe godet autobusin nё pjesёn ballore”, njofton policia.
Drejtuesi i automjetit nga lëndimet e marra ka ndërruar jetë në vendngjarje, gjë të cilën e ka konfirmuar ekipi mjekësor. Pesë persona të tjerë, të lënduar në këtë aksident, janë dërguar menjëherë në Spitalin Rajonal të Pejës, ku po marrin trajtim mjekësor.
Tutje policia njofton se me urdhër të prokurorit të shtetit, trupi i pajetë i viktimës është dërguar në Institutin e Mjekësisë Ligjore në Prishtinë për obduksion.
Aksident tragjik në Dollc të Klinës, një i vdekur dhe pesë të lënduar
Një aksident i rëndë trafiku ka ndodhur mëngjesin e sotëm në fshatin Dollc të Klinës, nga i cili ka humbur jetën një person, ndërsa pesë të tjerë kanë mbetur të lënduar.
Lajmi është konfirmuar nga Spitali i Përgjithshëm i Pejës. Nga ky institucion shëndetësor kanë bërë të ditur se viktima është sjellë në Emergjencë pa shenja jete, ndërsa pesë personat e tjerë po marrin trajtimin e nevojshëm nga ekipet mjekësore.
“Një person është sjellë pa shenja jete në Emergjencë, ndërsa deri tani kemi pranuar pesë të lënduar nga ky aksident, të cilët po trajtohen dhe po marrin kujdesin e nevojshëm”, thuhet në njoftimin e spitalit.
Nga Spitali i Përgjithshëm i Pejës kanë bërë të ditur se për gjendjen e të lënduarve do ta informojnë opinionin publik në vijimësi.
