Policia e Kosovës ka bërë të ditur se ka realizuar me sukses një operacion policor në kryeqytet, duke arrestuar një person që ishte në kërkim prej kohësh për disa vepra të rënda penale.
Sipas njoftimit zyrtar, njësitet e Stacionit Policor “Qendra” në bashkëpunim me Njësinë e Reagimit të Shpejtë kanë ndërmarrë një aksion të befasishëm, ku është arrestuar personi R.G., 30 vjeç, shtetas i Republikës së Kosovës.
I dyshuari ishte i kërkuar me gjashtë urdhëresa gjykate dhe tri kërkime policore për veprat penale: tentim vrasje e rëndë, grabitje, kanosje, shkaktim i rrezikut të përgjithshëm dhe lëndim i rëndë trupor.
Pas arrestimit, ai është dërguar për të vuajtur dënimin e shqiptuar nga organet e drejtësisë.
Policia e Kosovës ka theksuar se aksione të tilla do të vazhdojnë, me qëllim të kapjes së personave të kërkuar dhe garantimit të rendit dhe sigurisë publike.
