Seanca konstituive e Kuvendit të Kosovës nuk ka arritur të përmbyllet as sot për shkak të pamundësisë për të zgjedhur nënkryetarin nga komuniteti serb. Deputeti i Vetëvendosjes, Hekuran Murati, ka kërkuar nga deputetët që të mbështesin kandidatin Nenad Rashiq.
“Sot kishim një Grup Parlamentar, si ai i LDK-së, i cili refuzoi të marrë pjesë në votim, përkundër që aktgjykimi i Gjykatës Kushtetuese thekson se deputetët janë të detyruar të marrin pjesë në votim. Ndërkaq, në anën tjetër kishim deputetët e PDK-së, të cilët abstenuar”, ka deklaruar Murati.
Ai ka shtuar se shpreson që gjatë 48 orëve në vijim, partitë që nuk ishin prezent të kthehen në seancën e pasnesërme dhe të votojnë për Rashiq.
“Nëse përsëriten votimet e PDK-së dhe LDK-së, pra qoftë duke mos marrë pjesë si LDK-ja apo duke abstenuar, atëherë përçohet mesazhi që asnjë deputet nga komuniteti serb nuk merr votat për nënkryetar, dhe kësisoj rasti mund të dërgohet edhe në Gjykatën Kushtetuese”, ka deklaruar ai.
Murati ka theksuar gjithashtu se nëse sigurohen edhe katër-pesë vota tjera nga partitë shqiptare për të votuar për deputetin Rashiq, atëherë konstitohet Kuvendi dhe “arrihet që Lista Serbe të mos jetë në Kryesinë e Kuvendit.”
