Kryetari i Kuvendit të Kosovës, Dimal Basha, ka deklaruar se e vlerëson kontributin e Liburn Aliut si aktivist i Lëvizjes Vetëvendosje dhe si ministër, duke theksuar se pakënaqësitë brenda subjektit politik janë të natyrshme.
I pyetur nga gazetarët për dorëheqjen e Aliut, i cili si arsye kishte përmendur zgjedhjen e Bashës kryeparlamentar, ai tha se nuk dëshiron të japë shumë komente, por se e respekton punën e ish-ministrit.
“E çmoj kontributin e tij si aktivist në Lëvizjen Vetëvendosje, ashtu siç e çmoj kontributin e secilit aktivist tjetër që ka dhënë për LVV-në. Po ashtu respektoj edhe punën që ka bërë si ministër. Është krejtësisht e natyrshme të ketë pakënaqësi mes nesh, sepse edhe unë si deputet kam pasur mospajtime me ministra dhe kemi debatuar hapur në Kuvendin e Republikës”, tha Basha në konferencë për media.
Ai shtoi se kjo është pjesë e demokracisë dhe nuk përbën diçka të jashtëzakonshme.
“Edhe në familje ndonjëherë ka mospajtime. Me rëndësi është që të vazhdojmë rrugëtimin para”, theksoi kryeparlamentari.
