Kryetari i PDK-së Memli Krasniqi pas ndërprerjes së seancës, e cila ende nuk dihet se kur do të vazhdojë, ka thënë se procesi i votimit të nënkryetarit nga komunitet serb është jokushtetues.
“Votimi është jokushtetues, çka prodhon një votim i tillë?, prodhon një lëndë që shkon në Kushtetuese. Çka mund të prodhojë ajo më tutje?, një vonesë në konstituimin e Kuvendit, potencialisht apo edhe në tentimin për krijimin e qeverisë. Albin Kurti po tenton të blejë kohë, të vazhdojë krizën, të vazhdojë bllokadën, mos me hy të matet a i ka votat”, tha ai.
Krasniqi e ka quajtur absurde kërkesën e LVV-së për ta zgjedhur Rashiqin nënkryetar Kuvendi.
“Kërkesa absurde e tyre këto ditë ka qenë nuk ka lidhje që e shkelim Kushtetutën, hajde ta bëjmë Nenad Rashiqin. Por, më e rëndësishme është Kushtetuta, sepse është bazamenti mbi të cilin është ndërtuar ky shtet. Nuk mund që me vetëdije t’i kërkosh një deputeti ta shkelë Kushtetutën, e pse është shkelje Kushtetuese unë e di që ju e dini që është pak më e specifikuar, sepse duhet të zgjedhin ata vetë kush i përfaqëson, siç e zgjodhën komunitetet jo serbe, është e drejt e tyre kënd duan. Është hera e parë që po ballafaqohemi me një situatë të tillë. Besoj e kujtoni një pjesë e juaja kanë qenë gazetarë edhe para 4 vitesh, LVV-ja e ka votuar Sllavko Simiqin nënkryetar, qysh është bërë ai, me votat e LVV ka qenë nënkryetar në legjislaturën e kaluar, me Glauk Konjufcën kryetar. Por është pjesë e populizmit, por mbi të gjitha sot po ju shërben për të vazhduar bllokadën e për të mbetur si uzurpator në zyrën e kryeministrit, Albin Kurtit e mos të hyjë e të matet e të dëshmohet para qytetarëve se nuk i ka votat”, deklaroi Krasniqi.
