Kremlini tha sot se është ende i interesuar në vazhdimin e bisedimeve të paqes me Ukrainën, pavarësisht sulmit të madh dhe vdekjeprurës rus gjatë natës në Kiev.
17 të vrarë, përfshirë katër fëmijë
Zyrtarët ukrainas thanë se të paktën 15 persona, përfshirë katër fëmijë, u vranë në sulmin në kryeqytetin ukrainas. Presidenti ukrainas Volodymyr Zelensky tha se kjo ishte përgjigja e Moskës ndaj përpjekjeve diplomatike për t’i dhënë fund luftës.
I pyetur nëse kishte ndonjë kontradiktë midis dëshirës së deklaruar të Moskës për të çuar përpara bisedimet e paqes dhe sulmeve, zëdhënësi i Kremlinit, Dmitry Peskov, u tha gazetarëve se të dyja palët vazhdojnë të sulmojnë njëra-tjetrën, por se Rusia mbetet e interesuar në arritjen e qëllimeve të saj përmes diplomacisë.
Kremlini: Nuk po i shënjestrojmë civilët me qëllim
Forcat ruse vazhdojnë të shënjestrojnë infrastrukturën ushtarake ukrainase dhe Ukraina vazhdon të sulmojë infrastrukturën ruse, përfshirë infrastrukturën civile, tha zëdhënësi. Peskov ka thënë vazhdimisht se Rusia nuk i shënjestron qëllimisht civilët.
“Operacioni special ushtarak vazhdon. Mund të shihni se sulmet e regjimit të Kievit ndaj infrastrukturës ruse, shpesh ndaj infrastrukturës civile ruse, po vazhdojnë gjithashtu. Forcat e armatosura ruse po kryejnë gjithashtu detyrat e tyre”, tha ai.
Peskov tha se në të njëjtën kohë, Rusia “mbetet e interesuar në vazhdimin e procesit të negociatave me qëllim arritjen e qëllimeve tona përmes mjeteve politike dhe diplomatike”.
