Një ditë para se të shënohet Dita Ndërkombëtare e të Zhdukurve janë lansuar dëshmitë e disa familjarëve të të zhdukurve.
Lansimi i këtyre dëshmive është bërë nga Rrjeti Ballkanik i Gazetarisë Investigative (BIRN). Drejtoresha Ekzekutive e BIRN, Jeta Xharra tha se mbas 25 vjetësh mbi 1000 informacione i janë dorëzuar Prokurorisë Speciale, duke treguar për një projekt të intervistave dhe dëshmive që janë duke i bërë nga familjarët e personave të zhdukur.
Alessandro Bianciardi nga Zyra e BE-së në Kosovës tha se roli i gazetarëve është i pazëvendësueshëm në këtë drejtim. Dokumentimi i së kaluarës me saktësi, duke i dhënë drejtësi viktimave dhe duke i dënuar kryerësit e veprave nuk është vetëm një domosdoshmëri por edhe një obligim, tha ai.
Albulena Haxhiu, nënkryetare e Kuvendit, theksoi se çështja e personave të zhdukur është plagë e hapur për Kosovën dhe një nga sfidat më të mëdha që nga paslufta.
Sipas saj, Komisioni Qeveritar për Personat të Zhdukur mbetet një shtyllë në këtë proces me gjithë akterët e tjerë në zbardhjen e personave të zhdukur. Por, që Haxhiu tha se kanë kërkuar nga partnerët ndërkombëtar që t’i bëhet presion Serbisë në zbardhjen e fatit të personave të zhdukur, pasi sipas saj Serbia në vazhdimësi ka hezituar të bashkëpunojë për këtë çështje.
