Kryetari i Kuvendit, Dimal Basha, ka kërkuar falje për artikullin që në bashkautorësi me të, Ushtria Çlirimtare e Kosovës etiketohet si organizatë e financuar nga paratë e trafikantëve të drogës.
Në një konferencë për media pas dështimit të mbledhjes së kryesisë së Kuvendit, Basha ka thënë se ka qenë i pakujdesshëm, në raport me artikullin.
“Kërkoj falje për pakujdesinë time. Duhet ta pranoj që kam qenë i pakujdesshëm dhe i pavëmendshëm. Unë kam kërkuar që të tërhiqet kapitulli dhe emri im nga punimi. Unë nuk kam të bëjë asgjë me këtë. Unë kërkoj falje për pavëmendjen time, por askush nuk mund ta vë në dilemë atdhetarizmin tim”, ka thënë ai.
Basha kishte deklaruar se ai kishte dhënë kontribut në këtë artikull për pjesën ku trajtohet radikalizmi islamik dhe jo në pjesën e financimit të UÇK-së.
“Më është kërkuar një kapitull për fushën që ti ki hulumtime dhe unë e kam dorëzuar kapitullin me bindjen që do të publikohet kapitull i veçantë që po e mbulon atë fushë, pasi globalizimi ka qenë një nga arsyet që ka ardhur deri te hulumtimi që kam bërë unë, por jo që do të dalë bashkautorësi me dikë tjetër. Në asnjë moment nuk kisha pranuar të jem bashkautor ku flitet ashtu për UÇK-në. Prej vitit 2008 publikoj edhe opinione, por asnjëherë në asnjë moment nuk e kam ditë që do të publikohet si bashkautorësi. Ka qenë kur kam qenë student, dhe unë kurrë në jetë nuk e kam lexuar artikullin. Hera e parë e pashë kur është publiku ku është artikulli komplet”, ka thënë Basha.
