Instituti Kombëtar i Shëndetësisë Publike të Kosovës (IKSHPK) dhe Kompania Rajonale e Ujësjellësit “Prishtina” (KRU Prishtina) informojnë qytetarët për ngritjen e përqendrimit të manganit në ujë në zonat që furnizohen nga liqeni akumulues i Badocit.
Sipas njoftimit, analizat laboratorike të fundit kanë evidentuar një rritje të nivelit të manganit, e cila tejkalon kufirin administrativ të përcaktuar në Udhëzimin Administrativ nr. 10/2021 për cilësinë e ujit për konsum njerëzor. Megjithatë, vlerat e manganit nuk kanë kaluar pragjet shëndetësore që mund të dëmtojnë shëndetin e qytetarëve.
Në kuadër të masave parandaluese, IKSHPK apelon që uji nga fabrika në liqenin Badoc të mos përdoret për pije deri në njoftimin tjetër, duke theksuar se vlimi i ujit nuk largon manganin. Uji mund të përdoret vetëm për pastrim dhe higjienë personale.
Tutje thuhet se në koordinim me IKSHPK, KRU Prishtina ka ndërmarrë masa të menjëhershme për reduktimin e sasisë së prodhimit të ujit për të ruajtur cilësinë, intensifikimin e shpëlarjes së rrjetit shpërndarës, duke përfshirë gypat magjistral dhe sekondar dhe sigurimin e furnizimit me ujë të pijshëm përmes autoboteve në zonat e prekura.
Zonat e prekura përfshijnë Qytezën e Graçanicës, fshatrat përreth, Hajvalinë, Veternikun, Lagjet 038, Qëndresa, Swiss Village, Preocin, Çagllavicën dhe disa rrugë dhe lagje të Prishtinës si dhe zona të tjera afër qendrës tregtare dhe shkollave.
