Në fillim të vitit të ri shkollor, partitë opozitare kanë adresuar urimet, por edhe kritikat ndaj Qeverisë dhe Ministrisë së Arsimit për gjendjen e sistemit arsimor të vendit. Ata kanë ngritur shqetësime për mungesën e reformave, mënyrën e subvencionimit të librave shkollorë dhe kushtet e vështira në të cilat zhvillohet mësimi.
Sipas tyre, prindërit përballen me kosto të larta për sigurimin e teksteve, mësimdhënësit punojnë pa mbështetje të mjaftueshme dhe mungesën e mjeteve digjitale në shkolla.
Në ditën e parë të fillim vitit të ri shkollor, partitë opozitare uruan por edhe drejtuan kritika në adresë të Ministrisë së Arsimit dhe Qeverinë për gjendjen e arsimit në vend.
Duke uruar një vit të mbarë shkollor, kryetari i Partisë Demokratike, Memli Krasniqi, ka shkruar se arsimi mbetet shtylla kryesore e zhvillimit të Kosovës, ndaj investimi më i madh që mund të bëjmë është ai në dije, në rini dhe në shkollën tonë, sepse aty fillon çdo e ardhme më e mirë për vendin.
Ndërkohë, gjatë një konference, Lidhja Demokratike kritikoi Ministrinë e Arsimit për mënyrën e subvencionimit të teksteve shkollore, për mungesë reformash në sistemin arsimor dhe mungesë të investimeve serioze në këtë fushë.
“Për fat të keq, ky vit shkollor nuk na gjen të përgatitur. Nuk ka pasur reforma përmbajtësore që të ngritin cilësinë në arsim. Fëmijët ndjekin mësimin në kushte minimale, ndërsa mësimdhënësit gjenden pa paga dinjitoze, pa përkrahje të duhur dhe me kushte të vështira pune. Ata nuk kanë mjete digjitale, as kurikulë digjitale. Po ashtu, prindërit përballen me vështirësi të jashtëzakonshme në sigurimin e teksteve, sepse Ministria e Arsimit, në pamundësi për të përmbushur obligimet ligjore, ia ka kaluar këtë përgjegjësi atyre. Shumica e prindërve sot, më 1 shtator, nuk i kanë marrë subvencionet e planifikuara për shkak të vonesave dhe mungesës së librave në librari e shtëpi botuese. Për më tepër, kostoja e librave është dukshëm më e lartë sesa do të ishte në rast se MAShT do t’i siguronte vetë”, tha Jehona Lushaku- Sadriu, deputete në LDK.
Deputetja e LDK-së theksoi se çmimi mesatar i librave bazë për filloristët është 120 deri në 140 euro, ndërkohë që mbështetja e Ministrisë së Arsimit është vetëm 80 euro.
Në këtë ditë të parë për shkollarët e vendit, edhe kreu i AAK-së Ramush Haradinaj, pos urimit nderoi sakrificën e mësimdhënësve, që nëpër kohë të ndryshme bartën mbi supe barrën e madhe kombëtare për ngritjen e brezave të tërë. Haradinaj shkroi se në këtë kohë arsimi është përballë sfidave të mëdha, duke nisur nga problemet me tekstet shkollore, kushtet e rënduara për mësim, paga nën dinjitet të mësimdhënësit dhe problem për t`i siguruar librat shkollorë, që mbeten më shumë barrë e prindërve.
