Në kampin e Njësive Speciale në Vrellë u mbajt ceremonia solemne e certifikimit të 48 pjesëtarëve të rinj të Njësisë Speciale Operative (NJSO), të cilët përfunduan me sukses trajnimin bazik për operatorë të kësaj njësie elitare të Policisë së Kosovës.
Në ceremoni morën pjesë drejtori i Përgjithshëm i Policisë së Kosovës, kolonel Gazmend Hoxha, drejtori i Departamentit të Njësive Speciale, kolonel Shabani, zyrtarë të lartë policorëpërfaqësues të Ambasadës Amerikane, KFOR-it amerikan dhe institucioneve shtetërore.
Sipas njoftimit nga Policia , gjatë ceremonisë u certifikuan edhe 5 instruktorë të trajnimit themelor për NJSO, si dhe u ndanë mirënjohje për kontributin e tyre në përgatitjen e gjeneratës së re të operatorëve.
“ Këta pjesëtarë të rinj, të përgatitur nga instruktorë me përvojë dhe përkushtim të lartë, janë tashmë gati të përballen me detyrat dhe sfidat policore – gjithmonë në mbrojtje të rendit, ligjit dhe sigurisë, në shërbim të qytetarëve dhe të Republikës së Kosovës”, thuhet në njoftim.
