Pekini ende nuk i ka konfirmuar njoftimet e bëra nga Vladimir Putin dhe kreu i gjigantit rus të energjisë Gazprom për një marrëveshje të nënshkruar më parë këtë javë për të ndërtuar një tubacion të ri gazi nga Rusia në Kinë, raportoi Financial Times (FT ) .
Të martën, drejtori ekzekutiv i Gazprom, Alexey Miller, njoftoi nënshkrimin e një “memorandumi ligjërisht të detyrueshëm” me Korporatën Kombëtare të Naftës të Kinës mbi ndërtimin e tubacionit Power of Siberia 2, i cili do të lidhë fushat ruse të gazit në Siberinë perëndimore me Kinën nëpërmjet Mongolisë.
Putini e konfirmoi deklaratën e Gazpromit në një konferencë për shtyp të mërkurën në mbrëmje që dha në Pekin, në fund të vizitës së tij katër-ditore në vend për të marrë pjesë në samitin e Organizatës së Bashkëpunimit të Shangait në Tianjin.
Megjithatë, siç vuri në dukje FT, as Presidenti Kinez Xi Jinping dhe as media kineze nuk kanë komentuar mbi memorandumin, dhe komunikata zyrtare e lëshuar nga Ministria e Jashtme kineze pas vizitës së Putinit në Kinë fliste vetëm për “bashkëpunim në infrastrukturë dhe energji”, pa e përmendur tubacionin me emër.
Moska dhe Pekini kanë qenë në negociata mbi ndërtimin e “Fuqia e Siberisë 2” për gati 20 vjet, por marrëveshja ka dështuar vazhdimisht, pasi kushtet e propozuara nga Kina u bënë gjithnjë e më të pafavorshme për Kremlinin, ndërsa pozicioni i saj negociues u dobesua , veçanërisht që nga pushtimi i plotë i Ukrainës në vitin 2022.
Sipas analistëve të industrisë që folën me Novaya Europe, “memorandumi ligjërisht i detyrueshëm” i nënshkruar në Pekin në fillim të kësaj jave është në fakt vetëm një dokument i përkohshëm që nuk është aspak një kontratë, megjithëse ka një rëndësi të jashtëzakonshme për Kremlinin si një simbol i partneritetit të tij strategjik gjithnjë e më të ngushtë me Kinën.
