Në një operacion të MADH ndërkombëtar në Ekuador, iu dha një goditje e re rrjeteve kriminale që kontrabandojnë kokainë nga Amerika e Jugut në Evropë. Gjatë hetimit të nisur në vitin 2020 nga autoritetet belge dhe ekuadoriane me mbështetjen e Europolit, u sekuestruan më shumë se 9.3 ton kokainë dhe numri i përgjithshëm i arrestimeve u rrit në 26, raportoi Europol.
Rrjeti kriminal përdorte kompani private sigurie
Rrjeti kriminal përdorte kompanitë private të sigurisë si fasadë për të futur kontrabandë njerëzit e tij në portet kryesore të Ekuadorit, të cilat janë pika të rëndësishme për tregtinë e kokainës. Nëpërmjet këtyre kompanive, ata siguronin automjete të blinduara dhe armë zjarri, të cilat më pas ua kalonin bandave lokale. Këto grupe janë përgjegjëse për një valë dhune dhe vrasjesh të nxitura nga lufta për kontrollin e rrugëve të trafikimit të drogës.
Hetimi, i cili u nis nga autoritetet belge në vitin 2020, është mbështetur nga Europol që nga fillimi. Faza e parë e operacionit, e kryer në Belgjikë në prill 2020, rezultoi në arrestimin e 14 të dyshuarve dhe sekuestrimin e 4.6 ton kokainë dhe 10 armëve të zjarrit.
12 të dyshuar u ndaluan dje, u sekuestruan 3 automjete të blinduara
Operacioni i fundit u zhvillua dje në zonën Guayaquil të Ekuadorit. Dymbëdhjetë të dyshuar u ndaluan – 11 ekuadoras dhe një shtetas serb – dhe u kontrolluan 21 lokacione. Oficerët e policisë sekuestruan tre automjete të blinduara, 27,000 dollarë në para të gatshme, pesë armë zjarri dhe shtatë pajisje elektronike.
I gjithë hetimi u bazua në informacionin e marrë duke deshifruar platformën e komunikimit Sky ECC . Gjatë viteve të fundit, autoritetet i kanë dhënë një sërë goditjesh të rënda këtij rrjeti, duke sekuestruar gjithsej 9,344 kilogramë kokainë në 11 operacione në Ekuador, Belgjikë dhe Holandë.
Europol tha se operacioni lidhej me një goditje të një viti më parë kundër një grupi kriminal në Ballkanin Perëndimor. Rrjeti i çmontuar këtë javë në Ekuador besohet se u ka furnizuar me kokainë të dyshuarve të arrestuar në një operacion të mëparshëm, duke nënvizuar rëndësinë e bashkëpunimit ndërkombëtar në luftën kundër krimit të organizuar.
