Nënkryetarja e Kuvendit të Kosovës nga Vetëvendosje, Albulena Haxhiu e ka quajtur absurd vendimin e Kushtetueses për pezullimin e punës së legjislativit për 25 ditë, duke thënë se ata ishin të gatshëm për të vazhduar me krijimin e qeverisë së re.
Por, tha se tash njëherë po presin një vendim të Kushtetueses, ndonëse në mbledhjen e Këshillit të Përgjithshëm të partisë e mandatuan liderin, Albin Kurti për kryeministër.
“Ne kemi mbajtur mbledhjen e Këshillit të Përgjithshëm. Lëvizja ka votuar për mandatar kryeministrin e tashëm, Albin Kurti, kryetarin e Lëvizjes Vetëvendosje. Kemi pasur në plan të vazhdojmë menjëherë me procedurat për zgjedhjen e qeverisë. Për ne është absurde që Kushtetuesja ka pezulluar punën e 120 deputetëve të Kuvendit të Republikës së Kosovës”, tha ajo.
Haxhiu, bëri të ditur se për qeverinë e re janë të gatshëm të vazhdojnë negociatat e takimet me Nismën e Fatmir Limaj, apo edhe me ndonjë deputet të interesuar për bashkëqeverisje, por assesi tha se nuk e shohin PDK-në si partner, derisa përsëriti refuzimin që ia ka barë LDK-ja ofertës së tyre.
“ Sigurisht që ne kemi bërë të hapur se kë e kemi parë si partner, PDK-në assesi, me LDK-në kemi pasur përpjekje, por jemi refuzuar. Negociatat diskutimet e takimet mund të vazhdojnë me Nismën apo ndonjë deputet tjetër që është i interesuar të jetë pjesë e qeverisë së re, apo të jetë në bashkëqeverisje në qeverinë ‘Kurti 3’. Ne kemi thënë që duhet të ecim përpara, jo të ndalemi, ose me qeveri të re ose me zgjedhje të reja. Kur jemi të zgjedhjet, natyrisht që ky nuk ka qenë synim i yni kurrë, sepse qytetarët e Kosovës kanë vlerësuar me 9 shkurt që LVV-ja është subjekti më i madh me mbështetjen më të madhe e kryeministri Kurti është personi më i votuar ndonjëherë, dhe në këtë drejtim ne kemi që të interesuar ta bëjmë qeverinë. Duket që opozita nuk po e pranon rezultatin e 9 shkurtit, por për këtë ka folur populli, por zgjedhjet, nëse nuk ka interes apo vullnet për ta bërë qeverinë, për të qenë në qeverisje me Vetëvendosjen , janë të mundshme”, deklaroi Haxhiu.
