Princi Harry i Britanisë mbërriti të mërkurën në rezidencën e babait të tij, Mbretit Charles III të Britanisë së Madhe, për atë që media britanike raporton se do të jetë takimi i tyre i parë që nga shkurti i vitit 2024.
Princi, njëherësh Duka i Sussex, ndodhet në Britani që nga e hëna. Ai u pa duke hyrë me makinë në rezidencën mbretërore Clarence House në Londër, vetëm një orë pasi mbreti mbërriti atje. Charles III u kthye në Londër nga Skocia të mërkurën, duke shkaktuar spekulime në shtypin britanik rreth një pajtimi të shumëpritur midis babait dhe të birit.
Harry i ndërpreu lidhjet me familjen mbretërore në vitin 2020 dhe u zhvendos në Kaliforni. Ai nuk e ka parë të atin që kur fluturoi për në Mbretërinë e Bashkuar vitin e kaluar kur mbretit iu diagnostikua kanceri. Në maj, Harry zbuloi se ata nuk ishin në kontakt për shkak të betejave të tij të shumta ligjore në Mbretërinë e Bashkuar dhe akuzave që ai ka bërë kundër familjes mbretërore në intervista televizive të profilit të lartë dhe në kujtimet e tij. Megjithatë, Princi Harry tha se shpresonte për një “pajtim” sepse “nuk e di se sa kohë i ka mbetur babait tim”.
Të hënën, princi vizitoi varrin e gjyshes së tij, Mbretëreshës Elizabeth II, e cila vdiq më 8 shtator 2022, dhe është planifikuar të marrë pjesë në disa aktivitete bamirësie.
Që kur e pa të atin për herë të fundit, ai është kthyer në Mbretërinë e Bashkuar tri herë, por ende nuk e ka parë atë – madje as në një ditë kur ata ishin në evente të ndara vetëm dy milje larg njëri-tjetrit.
Më 9 korrik, sekretari i shtypit i mbretit dhe zyrtari kryesor i shtypit i princit u panë duke u takuar në Londër. The Mail on Sunday publikoi një fotografi të tyre të ulur së bashku në një tarracë private me përfaqësuesin britanik të Harry-t, duke nxitur spekulime rreth një takimi të mundshëm baba-bir.
