Në Vlorën e detit dhe të këngës, aty ku shpirti i polifonisë ngjitet drejt qiellit,një nga rrugët do të mbajë me krenari emrin e poetit dhe mjeshtrit të madh, princit të këngës shumëzërëshe Lefter Çipa.
Kete nderim të thellë e bëri të ditur nipi i tij, Akri Çipa, i cili ndau gëzimin dhe mirënjohjen e familjes:
“Në qytetin ku kishte zemrën dhe pranverimin e tij shpirtëror, merr emrin e poetit një rrugë. Shpirti i tij në amëshim ka gjetur një shenjë falënderimi dhe mirënjohjeje për këtë përjetësim. Faleminderit Vlora jonë! Mirënjohje vlonjatëve të zemrës dhe shpirtit të pabjerë! Faleminderit Këshillit Bashkiak, faleminderit propozuesve për këtë emërtim, faleminderit zotit Ermal Dredha, Kryetar i Bashkisë Vlorë, dhe faleminderit të gjithëve!”
Kështu, emri i Lefter Çipës, poetit të shpirtit dhe princit të polifonisë, do të mbetet përjetësisht i gdhendur jo vetëm në këngë e vargje, por edhe në vetë rrugët e qytetit që e deshi aq shumë.
Rrugët janë gjurmë kohe, por kur një rrugë mban emrin e një poeti, ajo bëhet këngë që nuk shuhet. Vlora i dhuroi këtij emri një vend të përjetshëm, aty ku frymëmarrja e tij poetike do të ecë bashkë me hapat e njerëzve.
Ky emërtim nuk është thjesht një shenjë nderimi, por një dritë mirënjohjeje që ndez kujtesën e përbashkët: se kënga jonë jeton sepse jetoi Lefter Çipa.
Në çdo hap të asaj rruge, tingujt e polifonisë do të thërrasin sërish: këtu jeton poeti ynë, këtu rron shpirti i Vlorës./I.K.
