Presidentja e Kosovës Vjosa Osmani, ka reaguar ashpër përmes një komunikate kundër “përndjekjes së vazhdueshme, të kundërligjshme e të rrezikshme” që, sipas saj, media të caktuara po ia bëjnë vajzave të saj të mitura.
Ajo e ka nisur reagimin duke kujtuar se për pesë vite me radhë vajzat e saj kanë ndjekur mësimet në shkollën publike “Ismail Qemali” në Prishtinë dhe është shprehur mirënjohëse për stafin e shkollës:
“Jam falënderuese përjetësisht ndaj mësueses së tyre… Falënderuese edhe ndaj pjesës tjetër të stafit të shkollës dhe udhëheqjes së shkollës për bashkëpunimin e tyre me prindërit.”
Osmani ka treguar se vajzat e saj janë përballur me probleme të shumta në këtë shkollë: “Probleme me kanalizime, ndërprerje të ujit, rrymës e ngrohjes, bllokada totale të toaleteve, mungesë pastrimi për muaj të tërë, mungesë sigurie në shkollë… konfiskim të mjeteve të rrezikshme nga disa nxënës, e çka jo tjetër.”
Por ajo thekson se disa gazetarë nuk kanë shkruar kurrë për këtë fakt, por përkundrazi kanë rrezikuar sigurinë e vajzave të saj:
“E vetmja gjë që bënin disa nga këta të ashtuquajtur gazetarë, ishte rrezikimi i sigurisë së vajzave të mia… duke publikuar vendndodhjen e tyre, klasat e tyre, incizime të paautorizuara të fytyrës së tyre, pa asnjë leje paraprake… Njësoj, pra incizime të paautorizuara të fëmijëvë të mitur, ata tentuan të bëjnë edhe sot.”
Presidentja ka shpjeguar edhe praninë e policisë. “Natyrisht që policia është prezente, sepse kjo u kërkohet me ligj dhe, sipas vlerësimit të vetë policisë, vajzat e mia hyjnë në kategorinë e rrezikshmërisë së lartë. Këto ligje nuk i kam hartuar unë dhe këtë vlerësim të rrezikshmërisë nuk e kam bërë unë. Kjo praktikë ekziston kudo në botë”, ka shpjeguar ajo.
Duke ngritur pyetjen “Në cilin vend demokratik ekspozimi dhe rrezikimi i jetës së fëmijëve bie brenda suazave të lirisë së shprehjes? Osmani ka theksuar se fëmijët e mitur, të kujtdo qofshin ata, nuk janë subjekt i interesit publik politik. “Imazhet dhe incizimet e paautorizuara të tyre në rrethana private shkaktojnë rrezik për sulme, kanosje e kidnapime eventuale… përkundër vlerësimit të policisë se një gjë e tillë është në kundërshtim me rregullat e sigurisë”, ka thënë ajo.
Presidentja ka paralajmëruar se do të ndërmarr çdo masë ligjore për të mbrojtur fëmijët e saj nga siç ka thënë ajo “këta të ashtuquajtur gazetarë”, që sipas saj, “krijojnë jo vetëm rrezik fizik, por edhe psikologjik, me pasoja afatgjata”.
Në komunikatën e saj, ajo ka sqaruar se ndryshimi i lokacionit të shkollës është bërë për shkak të problemeve të shkaktuara nga niveli i rrezikshmërisë së lartë dhe për shkak të ndryshimit të lokacionit ku jetojnë, ndërkohë që shkolla ‘Ismail Qemali’ tashmë është shumë larg nga vendbanimi.
Osmani ka kujtuar se “si presidente nuk ka asnjë kompetencë të vetme në çështje që lidhen me sistemin arsimor, përveç se të jap sugjerime.
“Ato bien ekskluzivisht në kompetencë të nivelit lokal (komunës) dhe atij qendror (qeverisë). Kjo nuk do të thotë që nuk janë bërë përpjekje e përmirësime, mirëpo sfidat janë ende tepër të mëdha e të vazhdueshme”, ka shtuar jo.
