Inspektorati komunal në Mitrovicën e Veriut, me asistimin e Policisë së Kosovës, ka mbyllur një objekt në afërsi të tre rrokaqiejve, ku dyshohet se vepronin struktura ilegale të Serbisë. Sipas komunës, aty operonin Fondi Republikan për Sigurimin Shëndetësor dhe ai Pensional i Serbisë.
Kontrolli ka treguar se nuk kishte dokumentacion të vlefshëm, ndaj puna është pezulluar dhe procedurat do të vijojnë sipas ligjit.
Këtij objekti në afërsi të tre rrokaqiejve në Mitrovicë të Veriut, inspektorati ia ka vënë shiritat. Këtu dyshohet se strukturat paralele të Serbisë kanë zhvilluar aktivitet ilegal.
Visar Syla, shef i kabinetit të kryetarit në Komunën e Mitrovicës së Veriut, ia ka konfirmuar RTK-së se në këtë objekt kanë vepruar Fondi Republikan për Sigurimin Shëndetësor të Serbisë dhe Fondi Republikan për Sigurimin Pensional Invalidor i Serbisë i ashtuquajtur PIO
“Gjatë kontrollit është konstatuar se personat e hasur në objekt nuk kanë pasur dokumentacion të vlefshëm për ushtrimin e veprimtarisë së përmendur. Për këtë arsye, puna është pezulluar përkohësisht, ndërsa procedura e mëtejshme do të zhvillohet në mënyrë të rregullt, në përputhje me ligjet dhe kompetencat në fuqi”, tha Syla.
Inspektoratin e ka asistuar Policia e Kosovës në verifikim e këtij objekti ku dyshohet se kanë operuar këto dy institucione ilegale të Serbisë
“Kemi asistuar inspektoratin komunal të Mitrovicës së veriut në mënyrë që të kontrollojnë dy lokacion në afërsi të tre rrokaqiejve. Pas diskutimit nga ana e inspektorëve komunal kanë vendosur me i mbyllë këto lokacione ndërsa policia nuk ka hasur në ndonjë problem”, tha Veton Elshani, zëvendësdrejtor i stacionit veri.
Deri më tani disa objekte ku kanë vepruar struktura ilegale të Serbisë në veri, janë shuar nga shteti i Kosovës.
