“Z. President, im shoq ju donte. Dhe ai e dinte që edhe ju e donit atë”, tha Erica Kirk me lot në sy, duke falënderuar gjithashtu zëvendëspresidentin e SHBA-së J. D. Vance.
Eveja e Charlie Kirk , Erica , mbajti një fjalim plot tension dje, të premten, disa ditë pasi bashkëshorti i saj u qëllua për vdekje në një kampus universitar në Utah të mërkurën.
Në transmetimin e drejtpërdrejtë, duke folur pranë karriges bosh të burrit të saj që ai e përdori gjatë regjistrimeve të podkastit të tij , ajo citoi fragmente nga Bibla dhe foli për dashurinë e Kirk për Donald Trump, zëvendëspresidentin Vance, Shtetet e Bashkuara dhe dy fëmijët e çiftit.
Kirk, një aktivist i krahut të djathtë, u qëllua për vdekje të mërkurën gjatë një eventi ku mbajti një fjalim publik në Orem të Utah-s . I dyshuari për vrasjen e tij, Tyler Robinson , u arrestua të enjten në mbrëmje.
Në fjalën e saj, Erica Kirk premtoi se zëri i burrit të saj “nuk do të heshtë”.
Transmetimi nga selia e Turning Point në Arizona filloi me disa minuta heshtje, ndërsa kamera u përqendrua në karrigen bosh të Charlie Kirk .
Kur e veja e tij u ngjit në podium, ajo ngriti kokën dhe pëshpëriti një lutje në heshtje.
Më pas ajo falënderoi njerëzit që nxituan të ndihmonin bashkëshortin e saj pas sulmit vrasës, si dhe Shtëpinë e Bardhë.
“Z. President, im shoq ju donte. Dhe ai e dinte që edhe ju e donit atë”, tha ajo me lot në sy, duke falënderuar gjithashtu Vance dhe gruan e tij, Usha, të cilët shoqëruan arkivolin për në Arizona.
“Por mbi të gjitha, Çarli i donte fëmijët e tij. Dhe më donte mua. Me gjithë zemër. Dhe sigurohej që unë ta dija këtë çdo ditë”, shtoi ajo.
Znj. Kirk tha, ndër të tjera, duke iu drejtuar “keqbërësve”, siç e tha ajo, se “nuk keni idenë se çfarë zjarri keni ndezur”.
“Të gjithë duhet ta dinë këtë: Nëse mendonit se misioni i burrit tim ishte i fuqishëm më parë, nuk keni idenë se çfarë i keni lëshuar të gjithë vendit dhe botës”, vazhdoi ajo.
Erika Kirk është një grua biznesi dhe ish-fituese e konkursit të bukurisë Miss Arizona. Ajo u takua me bashkëshortin e saj në vitin 2018 dhe çifti u fejua në vitin 2020 dhe u martua më pak se një vit më vonë.
