Kroçera “Voyager of the Seas”me 3626 pasagjerë ka mbërritur për herë të parë në portin e Sarandës.
Zëvendëskryeministrja dhe njëherësh ministrja e Infrastrukturës dhe Energjisë, Belinda Balluku përmes një postimi në rrjetet sociale tha se “turistët e mbërritur përmes saj janë përpunuar nga porti i Sarandës, i cili në 8 muajt e parë të këtij viti ka një rritje të numrit të pasagjerëve me 21%, krahasuar me të njëjtën periudhë të vitit të kaluar”.
“Kroçera “Voyager of the Seas” i shtohet numrit prej 70 kroçera të planifikuara për këtë sezon për të ardhur në Sarandë”, tha Balluku.
Kroçera “Voyager of the Seas” me flamur Bahamas mbërriti dje në Portin e Sarandës.
Gjeografia e turistëve ishte e larmishme, pra nga disa shtete si australianë, amerikanë dhe kanadezë të moshave të ndryshme.
Turistët u ndanë në grupe të ndryshme sipas destinacioneve përkatëse të përzgjedhura prej tyre si në Butrint, kalanë e Lëkurësit, Syrin e Kaltër, apo në qytetet e Gjirokastrës dhe Përmetit.
Gjatë këtij viti Porti Detar, Komisariati i Policisë Kufitare, Kapiteneria dhe Dogana Sarandë kanë marrë të gjitha masat për mbarëvajtjen e sezonit turistik, i cili vijon edhe gjatë vjeshtës me ardhjen e turistëve të shumtë./ata
