Policia e Kosovës ka ndaluar një person për dyshime lidhur me korrupsion dhe mashtrim në procedurat e prokurimit publik, në një aksion të koordinuar me Prokurorinë Themelore në Prizren.
Sipas Policisë së Kosovës, “përmes Sektorit për Hetime Financiare, në bashkëpunim dhe nën autorizimin e Prokurorisë Themelore në Prizren, është zhvilluar hetim lidhur me dyshimet për veprime të kundërligjshme në procedurat e prokurimit publik.”
Policia njofton se më 15 shtator 2025 është realizuar një kontroll në disa lokacione të lidhura me rastin, gjatë të cilit “janë sekuestruar pajisje të ndryshme elektronike dhe dëshmi tjera materiale që mund të shërbejnë në procedurën hetimore.”
Gjithashtu, në njërin nga lokacionet është gjetur një armë zjarri me municion, për të cilën “është iniciuar rast i veçantë në njësinë policore përkatëse.”
Personi i dyshuar është intervistuar në prani të avokatit mbrojtës dhe “me vendim të prokurorit kompetent është ndaluar për 48 orë.”
Policia e Kosovës thekson se “në koordinim të plotë me organet e drejtësisë, do të vazhdojë me ndërmarrjen e të gjitha veprimeve të nevojshme ligjore deri në sqarimin e plotë të rastit.”
