Presidentja Vjosa Osmani ka pritur sot në takim Ambasadorin e Republikës Franceze në Kosovë, Olivier Guerot, me të cilin ka diskutuar zhvillimet e fundit politike në vend dhe marrëdhëniet bilaterale ndërmjet Kosovës dhe Francës.
“Gjatë takimit u diskutuan zhvillimet e fundit politike në vend, rëndësia e funksionalizimit të plotë të të gjitha institucioneve të Republikës së Kosovës në pajtim me Kushtetutën, si dhe marrëdhëniet bilaterale ndërmjet Kosovës dhe Francës,” thuhet në njoftimin e Presidencës.
Në prag të Samitit të liderëve të Komunitetit Politik Evropian në Kopenhagë, presidentja Osmani dhe ambasadori Guerot diskutuan për takimet që pritet të zhvillohen gjatë samitit, si dhe për koordinimin lidhur me një sërë çështjesh që do të trajtohen aty,” theksohet tutje.
“Presidentja Osmani ritheksoi përkushtimin e saj për forcimin e bashkëpunimit ndërshtetëror, me theks të veçantë në fushën e sigurisë,” përfundon njoftimi i Presidencës.
