“Kërkesat e grave nuk janë luks”. Kështu tha sekretarja e përgjithshme e Partisë Demokratike të Kosovës, Vlora Çitaku, derisa iu drejtua kandidatit për kryetar të Gjilanit nga PDK-ja, Riad Rashiti, në takimin elektoral me gratë e kësaj komune, duke i kërkuar atij t’i marrë parasysh gjithmonë kërkesat e grave.
“Kërkesat e grave nuk janë kërkesa luksi, të kërkohet çerdhe për fëmijë, nuk është luks, të kërkohet ndriçim në rrugë që të ndihemi të sigurta derisa shkojmë në shkollë, punë e shtëpi nuk është luks, me ece pa frikën qenve endacak nuk është luks. Gruaja kur bënë kërkesa karshi pushtetit asnjëherë nuk i bën vetëm si grua, i bën edhe si nënë e si motër”, tha Çitaku.
Ndërkaq, Riad Rashiti, kandidat për kryetar të Gjilanit, premtoi se me të në krye të Gjilanit, 2 për qind e buxhetit total vjetor do të shkojë për fuqizimin e gruas.
“Deri sot jo vetëm Gjilani, por asnjë komunë nuk ka pasur buxhet të ndarë, linjë të veçantë të buxhetit për gratë. E unë në programin tim i kam dy për qind të buxhetit të përgjithshëm të komunës së Gjilanit të destinuara për fuqizimin e gruas. Vlera e 2 përqindëshit të buxhetit është 800 mijë euro në vit. Për katër vite 3.2 milion euro do të jenë të destinuara për fuqizimin e gruas në Gjilan, sepse ndryshe nuk mund të arrijmë atë që synojmë si shoqëri”, tha në këtë aktivitet elektoral kandidati i PDK-së për Gjilanin, Riad Rashiti.
