Një udhëheqës i talibanëve ka urdhëruar ndalimin e internetit me fibra optike në provincën Balkh në Afganistanin verior, duke përmendur “parandalimin e imoralitetit” si arsye zyrtare, ka konfirmuar një zëdhënës i administratës lokale. Kjo është hera e parë që një ndalim i tillë është futur që kur talibanët morën pushtetin në gusht 2021, shkruan Euronews .
Vetëm interneti celular është i disponueshëm.
Një “ndalim total” i vendosur nga udhëheqësi Hibatullah Akhundzada ka lënë zyrat qeveritare, sektorin privat, institucionet publike dhe familjet në rajon pa qasje në internetin kabllor dhe rrjetet Wi-Fi. Ndërsa interneti celular është ende i disponueshëm, banorët ankohen se lidhja është e ngadaltë dhe e shtrenjtë.
“Kjo masë është marrë për të parandaluar imoralitetin dhe do të ndërtohet një alternativë brenda vendit për nevojat thelbësore”, tha Haji Attaullah Zaid, një zëdhënës i qeverisë provinciale. Zaidi nuk dha informacione të mëtejshme se pse u zgjodh provinca Balkh për masën ose nëse ndalimi do të shtrihej në pjesë të tjera të vendit.
Qytetarët të shqetësuar për vendet e punës
Një banor i Balkhut, i cili dëshiroi të mbetej anonim nga frika e hakmarrjes, tha se kishte vënë re probleme me lidhjen disa ditë më parë. Ofruesi i tij i shërbimit fillimisht e siguroi se ishte një problem teknik: “Nuk mund ta kuptoj bllokimin e internetit në një epokë kaq të përparuar.”
Ai shtoi se një lidhje e shpejtë dhe e qëndrueshme është thelbësore për punën e tij, sepse punon me njerëz dhe kompani jashtë Afganistanit. “Mund të më duhet të zhvendosem nga Mazar-e-Sharif (kryeqyteti i Balkhut) në një provincë tjetër, sepse nuk mund ta përballoj këtë humbje”, përfundoi afgani. Autoritetet në Afganistan kanë mbyllur herë pas here rrjetet celulare në të kaluarën, më shpesh gjatë festave fetare për arsye sigurie.
