Kabineti i Presidentit të SHBA-së, Donald Trump, ka njoftuar se do t’u kërkojë kompanive të paguajnë 100,000 dollarë në vit për një vizë pune të përkohshme H-1B, gjë që mund t’i shkaktojë një goditje serioze sektorit të teknologjisë që mbështetet shumë te ekspertët nga India dhe Kina.
Që kur u kthye në Shtëpinë e Bardhë në janar, Trump ka prezantuar një sërë masash kundër imigracionit dhe disa nga lëvizjet e tij kishin për qëllim kufizimin e formave të caktuara të imigracionit të ligjshëm në SHBA. Reforma e njoftuar e programit të vizave H-1B është përpjekja më e spikatur deri më sot nga administrata Trump për të rishikuar sistemin e vizave të përkohshme të punës.
Ai pretendon se disa punëdhënës e shfrytëzuan programin për të ulur pagat.
“Nëse do të trajnoni dikë, do të jenë njerëz që janë diplomuar së fundmi nga disa nga universitetet më të mira në të gjithë vendin tonë. Trajnoni amerikanët. Ndaloni së sjelluri njerëz që po na marrin vendet e punës”, tha Sekretari i Tregtisë Howard Lutnick.
Disa punëdhënës kanë përfituar nga programi i vizave të përkohshme të punës për të ulur pagat, duke dëmtuar punëtorët amerikanë, sipas një urdhri ekzekutiv të nënshkruar nga Trump të premten.
Numri i punëtorëve të huaj në fushat e shkencës, teknologjisë, inxhinierisë dhe matematikës (STEM) në SHBA është më shumë se dyfishuar midis viteve 2000 dhe 2019, në gati 2.5 milionë, ndërsa punësimi i përgjithshëm në STEM u rrit vetëm me 44.5 përqind gjatë së njëjtës periudhë, thuhet në dokument.
Numri më i madh i vizave të përkohshme të punës të dhëna indianëve vitin e kaluar
“Kostoja e një vize të vetme, e cila do të jetë e vlefshme për tre vjet, do të jetë 100,000 dollarë në vit”, tha Lutnick, duke shtuar se qeveria ende po “përpunon” detajet specifike se si do të zbatohen tarifat. Tarifat e reja mund të shtojnë miliona dollarë në kostot e kompanive, duke i goditur veçanërisht rëndë kompanitë më të vogla të teknologjisë, vëren Reuters.
Disa analistë parashikojnë se futja e taksës mund t’i detyrojë disa kompani të zhvendosin një pjesë të biznesit të tyre me vlerë të lartë jashtë shtetit dhe si pasojë të pengojnë SHBA-në në garën për lidership në sektorin e inteligjencës artificiale.
Numri më i madh i vizave të përkohshme të punës, deri në 71 përqind, iu dha punëtorëve nga India vitin e kaluar, ndërsa qytetarët kinezë zunë vendin e dytë në listë, me një përqindje prej 11.7 përqind, sipas të dhënave zyrtare të SHBA-së.
Kompanitë e teknologjisë po udhëheqin sa i përket miratimeve të vizave. Amazon mori 12,000 viza pune të përkohshme në gjysmën e parë të vitit 2025, ndërsa Microsoft dhe Meta morën nga 5,000 secila. Lutnick tha se të gjitha kompanitë e mëdha janë dakord me tarifën e re.
Pothuajse të gjitha tarifat e vizave duhet të paguhen nga punëdhënësi
Shumë kompani të mëdha amerikane të teknologjisë, bankave dhe konsulencës refuzuan të komentonin mbi situatën ose nuk iu përgjigjën menjëherë kërkesës së Reuters për koment, dhe as ambasada indiane në Uashington dhe as konsullata e përgjithshme kineze në Nju Jork nuk u përgjigjën.
“Kongresi autorizoi qeverinë vetëm të vendoste tarifa për kostot e marrjes së një vendimi (për vizë),” tha Drejtori i Politikave të Këshillit Amerikan të Imigracionit, Aaron Reichlin-Melnick, në Bluesky, duke vënë në pikëpyetje ligjshmërinë e tarifës së re.
Programi H-1B u ofron punëdhënësve 65,000 viza në vit për të sjellë punëtorë të huaj të përkohshëm në fusha të specializuara dhe 20,000 viza të tjera për punëtorë shumë të kualifikuar. Sipas sistemit aktual, ka një tarifë të vogël për të marrë pjesë në lotarinë e vizave dhe një tarifë prej disa mijëra dollarësh nëse viza miratohet.
Pothuajse të gjitha tarifat e vizave duhet të paguhen nga punëdhënësi. Vizat H-1B jepen për një periudhë prej tre deri në gjashtë vjet. Trump nënshkroi gjithashtu një urdhër ekzekutiv që do t’u lejojë shtetasve të huaj të paguajnë 1 milion dollarë për një “biletë të artë” që do t’u lejojë atyre të banojnë përgjithmonë në Shtetet e Bashkuara.
