Te rinjtë e Kamenicës me qeverisjen e AAK-së do të kenë mbështetje në zhvillimin e ideve dhe perspektivë për të qëndruar në këtë komunë.
Kështu u shpreh kandidati për kryetar të Kamenicës nga radhët e AAK-së, Faton Jakupi, gjatë tubimit zgjedhor në lagjen “Malësia” të Kamenicës, ku u takua me të rinjtë e kësaj komune.
“Takimi me të rinjtë është shumë i rëndësishëm për të parë mundësitë se si në të ardhmen t’i mbështesim dhe ndihmojmë në zhvillimin e bizneseve dhe ideve të tyre, në mënyrë që të kenë arsye të qëndrojnë më gjatë në Kamenicë,” tha ai.
Përveç mbështetjes për të rinjtë, ai premtoi edhe investime në fusha të tjera si ne shëndetësi dhe arsim.
“Ne planprogramin tonë kemi paraparë zgjerimin e shërbimeve shëndetësore, duke planifikuar shtimin e katër autoambulancave të reja për t’u vënë në dispozicion të qytetarëve. Në arsim do të punojmë në rinovimin e objekteve shkollore dhe zbatimin e ditarit digjital, përmes të cilit prindërit do të informohen çdo ditë për pjesëmarrjen e fëmijëve të tyre në shkollë,” shtoi ai.
Krahas shëndetësisë dhe arsimit, Jakupi premtoi gjithashtu edhe investime në infrastrukturë.
