Presidentja e Republikës së Kosovës, Vjosa Osmani, ka kujtuar sot policin e rënë heroikisht në Banjskë, Afrim Bunjaku, në dyvjetorin e rënies së tij në mbrojtje të sovranitetit të atdheut.
Në një postim në Facebook, Osmani ka theksuar se 24 shtatori është ditë që kujton se liria kërkon sakrificë, por edhe se Kosova është e pathyeshme.
“Afrim Bunjaku ra hero në Banjskë, duke mbrojtur lirinë dhe dinjitetin e Kosovës. 24 shtatori na kujton se liria kërkon sakrificë, por edhe se Kosova është e pathyeshme. Asnjë sulm terrorist e agresion nga Serbia nuk mund ta ndalë të vërtetën. Kosova shtet sovran, i lirë e i pandashëm, do të mbetet realitet i pakthyeshëm e i përjetshëm. Lavdi e përjetshme heroit të Kosovës, Afrim Bunjaku”, ka shkruar Osmani, e cila ndodhet në Nju Jork, në kuadër të Asamblesë së Përgjithshme të OKB-së.
Më herët, kryeministri në detyrë, Albin Kurti, kryekuvendari, Dimal Basha, nënkryetarja e Kuvendit Albulena Haxhiu, zëvendëskryeministri në detyrë, Besnik Bislimi, ministrat në detyrë Xhelal Sveçla, Faton Peci e Hajrullah Çeku si dhe drejtori i Policisë së Kosovës, Gazmend Hoxha kanë bërë homazhe dhe kanë vendosur kurora lulesh në varrin e heroit, Afrim Bunjaku., i cili dy vjet më parë ra heroikisht pas agresionit që bëri Serbia në vendin tonë përmes grupit terrorist të prirë nga kryekrimineli Milan Radoiçiq.
