Banorët e lagjes “Dardania” në Fushë Kosovë patën mundësinë të bisedojnë nga afër me nënkryetarin e Lëvizjes Vetëvendosje, Glauk Konjufca, dhe kandidatin për kryetar komune të kësaj partie, Valon Prebreza. Në kuadër të fushatës elektorale, ata u zotuan se besimin e qytetarëve do ta kthejnë në zhvillim të infrastrukturës dhe përmirësim të shërbimeve komunale.
Glauk Konjufca theksoi se pas 24 vjetësh qeverisjeje nga e njëjta parti, Fushë Kosova ka nevojë për një drejtim të ri.
“Qyteti është rritur shumë në numër banorësh, por pushteti lokal nuk ka ditur të përballet me këtë zgjerim. Ky qytet ka nevojë për planifikim më të mirë dhe trajtim më serioz të sfidave të përditshme. Kandidati ynë, Valon Prebreza, ka një program gjithëpërfshirës për ta bërë Fushë Kosovën më funksionale dhe më të jetueshme”, deklaroi ai.
Valon Prebreza prezantoi disa nga projektet e tij kryesore, përfshirë ndërtimin dhe funksionalizimin e një ambulance të re, menaxhimin e pronave të KEK-ut, zgjidhjen e problemit të varrezave dhe mbështetjen e bujqve.
Ai gjithashtu theksoi rëndësinë e zhvillimit të hapësirave publike: “Brenda katër viteve, pronat publike që aktualisht janë nën menaxhimin e AKP-së, KEK-ut dhe Hekurudhave, do t’i shndërrojmë në hapësira funksionale për qytetarët: parqe, kopshte e shkolla. Projekti kryesor është kampusi i shkollave të mesme në lagjen Akarad, në një sipërfaqe prej tre hektarësh, që do të lehtësojë hapësirat ekzistuese dhe do të krijojë kushte më të mira për arsimin”
Zyrtarët e LVV-së theksuan se fushata e tyre në këtë komunë fokusohet te afërsia me qytetarët dhe prezantimi i planeve konkrete për zhvillimin e Fushë Kosovës.
