Rinor Nuhiu, këshilltar politik i presidentes Vjosa Osmani, i është kundërpërgjigjur ministrit të Jashtëm të Serbisë, Marko Gjuriq, lidhur me deklaratat e tij për mënyrën se si presidentja Osmani ka hyrë në Organizatën e Kombeve të Bashkuara.
Nuhiu, në një postim në platformën X, shkruan se “fabrika e lajmeve të rreme” e Aleksandar Vuçiqit dhe Marko Gjuriqit po punon me orar të zgjatur, ndërsa shton se presidentja Osmani është akredituar në përputhje me procedurat standarde të OKB-së, ashtu si çdo kryetar tjetër shteti.
“Gënjeshtër pas gënjeshtre. Presidentja e Republikës së Kosovës, Vjosa Osmani, nuk u ‘fut kontrabandë’ në OKB nga ‘një vend tjetër’, as nuk hyri si ‘turiste’. Ajo është e akredituar në përputhje me procedurat standarde të OKB-së, si çdo kryetar shteti tjetër. Serbia mund të bërtasë sa të dojë. Faktet nuk ndryshojnë. Kosova është këtu. Dhe është këtu për të qëndruar. Përgjithmonë, Kosova”, shkruan Nuhiu.
