Fshati Banullë i Lipjanit ka qenë vendi i radhës ku Partia Demokratike e Kosovës ka mbajtur tubim elektoral për zgjedhjet lokale të 12 tetorit.
Kandidati për kryetar të kësaj komune, Shukri Buja, prezantoi vizionin qeverisës për katër vitet e ardhshme. Ai përmendi ndërtimin e nënkalimeve si arterie kryesore urbane që do ta lidhin qytetin me rrugët e tjera, ndërtimin e një stacioni të ri, parkingjeve publike dhe zhvillimin e transportit publik.
“Investime në shkolla, në kabinete, në digjitalizimin e tyre, ngrohje dhe renovimin e tyre”, premtoj Buja.
Buja tha se Lipjani do të jetë “më mirë” me udhëheqjen e PDK-së, duke shtuar se investimet në planprogramin e tij do ta ndryshojnë rrënjësisht mirëqenien e qytetarëve.
Deputeti i PDK-së, Artan Behrami, tha se fitorja e PDK-së dhe rikthimi i Shukri Bujës në Lipjan është rikthim i vlerave të UÇK-së.
“Gjendemi para rikthimit të PDK-së në gjithë qytetet e Kosovës, para rikthimit të Shukri Bujës në Lipjan, dhe para rikthimit të Thaçit, Veselit e Krasniqit”, tha ai.
Po ashtu, PDK në Lipjan u zotua për ndërtimin e sallës së sportit, një pishine moderne për not, rregullimin e shtratit të lumit Sitnica, gjelbërim, përkrahje për ndërmarrësit e rinj dhe infrastrukturë moderne për gjithë qytetin – që do ta mundësonte një jetë më të mirë për qytetarët.
