Thellimi i bashkëpunimit transatlantik dhe avancimi i integrimit rajonal , ishte mesazhi kryesor nga vizita e Sekretarit të Përgjithshëm të RCC-së në SHBA.
Bashkëpunimi më i ngushtë transatlantik, forcimi i qëndrueshmërisë së Evropës Juglindore dhe përshpejtimi i integrimit ekonomik e politik të rajonit ishin në qendër të vizitës së Sekretarit të Përgjithshëm të Këshillit të Bashkëpunimit Rajonal (RCC), Amer Kapetanoviç, në Shtetet e Bashkuara të Amerikës.
Gjatë një diskutimi mbi të ardhmen e bashkëpunimit rajonal të organizuar nga Këshilli Atlantik, Kapetanović theksoi se rëndësia strategjike e Ballkanit Perëndimor për stabilitetin dhe prosperitetin e kontinentit kërkon një angazhim më të thellë mes rajonit dhe partnerëve transatlantikë.
“Rajoni ynë nuk është në periferi të Evropës – ai është pjesë integrale e stabilitetit dhe zhvillimit të saj. Vetëm përmes bashkëpunimit rajonal dhe partneritetit me SHBA-në dhe BE-në mund të shndërrojmë vizionin tonë në përfitime të prekshme për qytetarët dhe bizneset,” deklaroi Kapetanoviç.
Ai nënvizoi gjithashtu rolet kyçe të iniciativave rajonale të udhëhequra nga RCC-ja – si Tregu i Përbashkët Rajonal, Agjenda e Gjelbër për Ballkanin Perëndimor dhe Strategjia SEE2030 – duke i quajtur ato “instrumente konkrete që po e afrojnë rajonin me standardet evropiane”. Sipas tij, rezultatet e arritura deri tani – nga heqja e tarifave roaming deri te njohja reciproke e kualifikimeve profesionale – janë dëshmi se bashkëpunimi funksional sjell përfitime të menjëhershme për qytetarët.
Në këtë kontekst, Kapetanoviç theksoi se ruajtja e momentumit drejt integrimit evropian varet nga aftësia për të prodhuar rezultate konkrete dhe për të përkthyer proceset politike në ndryshime reale për shoqëritë e rajonit.
Vizita në Washington ishte pjesë e një turi më të gjerë diplomatik në SHBA, që përfshiu edhe angazhime në kuadër të Asamblesë së Përgjithshme të OKB-së në Nju Jork dhe nënshkrimin e një marrëveshjeje bashkëpunimi me Programin e Kombeve të Bashkuara për Zhvillim (UNDP).
