Gjatë javës së kaluar, zyrtarët policor të rajonit të Prishtinës kanë realizuar një sërë veprimesh të rëndësishme në kuadër të zbatimit të ligjit dhe ruajtjes së rendit publik.
Në periudha të ndryshme dhe në aksione të ndara, janë ekzekutuar gjithsej 196 urdhëresa të gjykatës, prej të cilave 89 kanë qenë për vepra penale, ndërsa të tjerat për kundërvajtje, verifikime dhe seanca.
“Personat e dënuar me burgim janë dërguar për vuajtje të dënimit, ndërsa ata të dënuar me gjobë janë liruar pasi kanë kryer obligimet e përcaktuara me urdhëresë”, thuhet në njoftim.
Policia ka vazhduar punën edhe në sektorë të tjerë të sigurisë, ku gjatë kësaj periudhe janë sekuestruar 9 armë zjarri të llojeve dhe kalibrave të ndryshëm.
Gjithashtu, janë shqiptuar 5,086 masa administrative për kundërvajtje dhe shkelje të kodit rrugor, prej të cilave 763 janë evidentuar nga vetura inteligjente dhe vetura me radar mobil.
