Lidhja Demokratike e Kosovës ka mbajtur një tubim elektoral me banorët e kryeqytetit. Në këtë ngjarje, kryetari i LDK-së, Lumir Abdixhiku, u shpreh se “nga kjo sallë e kuqe themi se Prishtina është e kaltër, se Prishtina është LDK, se Prishtina është me Përparim Ramën”, të cilin e cilësoi si lider modern dhe punëtor.
“Ky qytet nuk duhet të mbetet peng, duhet të ecë përpara. Kur ecë Prishtina, krejt Kosova ecë përpara. Përparim Rama është njeriu i urbanizmit modern, ai nuk erdhi nga politika me fjalë të thata por me punë, nuk erdhi me retorikë”, tha Abdixhiku.
Ai veçoi disa projekte që sipas tij janë arritje të rëndësishme të LDK-së në Prishtinë. Si projekt më të madh dhe si krenari më të madhe, ai përmendi mësimin tërëditor, i cili tashmë është zbatuar në 12 shkolla dhe që, sipas tij, gjatë mandatit tjetër do të shtrihet në të gjitha shkollat e kryeqytetit. Po ashtu, Abdixhiku foli për projektin e Unazës së Qytetit, të cilën e quajti standard të ri për Prishtinën dhe që sipas tij mban vulën e LDK-së.
“Me LDK-në nisi rruga A, me LDK-në nisi rruga B, rruga C, rruga E…”, tha Abdixhiku, duke theksuar se qeverisja në kryeqytet nuk ka qenë e lehtë për shkak të, siç tha ai, pengesave të shkaktuara nga qeveria qendrore në detyrë.
Ndërkaq, kandidati për një mandat të dytë në krye të Komunës së Prishtinës, Përparim Rama, para banorëve të kryeqytetit premtoi përfundimin e projekteve të nisura dhe realizimin e projekteve të reja që do të transformojnë plotësisht Prishtinën në katërvjeçarin e ardhshëm.
“Kemi me fituar pa balotazh, sepse kemi punuar katër vite pa ndalë. Rruga A, lidhja e Veternikut me rrugën A, kemi punuar shumë”, tha ai.
Rama gjithashtu falënderoi bashkëshorten dhe fëmijët e tij për mbështetjen, duke theksuar kthimin e tyre në Prishtinë si pjesë e angazhimit të përbashkët për qytetin.
Në fjalën e tij, kryetari i Degës së Katërt të LDK-së në Prishtinë, Besian Mustafa, tha se kjo lagje është vendi ku u vunë themelet e LDK-së, të lirisë dhe të demokracisë. “Këtu, në Dardani, Ulpianë, Qendër, Qafë, Shkabaj e Kalabri, kemi rrënjët tona. Këtu na kanë rritë prindërit tanë e këtu ne po i rrisim fëmijët tanë”, theksoi Mustafa.
Ai shtoi se fitorja e LDK-së është e pashmangshme dhe e domosdoshme, duke e cilësuar si garanci për të ardhmen: “Sot qeverisim me Përparim Ramën në Prishtinë dhe nesër me Lumir Abdixhikun kryeministër”, tha ai.
Në këtë tubim, LDK prezantoi edhe kandidatët për Kuvendin Komunal të Prishtinës, për të cilët u tha se janë vizionarë dhe të gatshëm për të punuar drejt dhe në shërbim të qytetarëve.
