KADC: Nevojë urgjente për veprim kundër “vaping” pranë shkollave – kërkohet mbrojtje e të rinjve nga duhani dhe produktet e reja

Qendra Kosovare për Avokim dhe Zhvillim (KADC) ka organizuar një tryezë diskutimi urgjente me temën: “Rreziku i ‘Vaping’ pranë shkollave: Nevoja për veprim të përbashkët”, ku u theksua domosdoshmëria e ndërhyrjes institucionale për mbrojtjen e të rinjve nga përdorimi i duhanit dhe produkteve të tij të reja.Drejtori i KADC-së, Shkumbin Spahija, tha se një prej synimeve kryesore është krijimi i shërbimit për ndërprerjen e duhanpirjes si një mundësi shëndetësore për qytetarët.“Një prej objektivave është themelimi i shërbimit të ndërprerjes së duhanpirjes për popullatën tonë. Për të pasur sukses, vetëdijesimi është i domosdoshëm dhe përfshirja e prindërve është thelbësore”, tha Spahija.Nga ana tjetër, Valdet Hashani nga QKMF premtoi mbështetje institucionale dhe avokim drejt politikëbërësve. Ai theksoi se trajnime të tilla janë të domosdoshme për t’i ndihmuar të rinjtë që duan të lënë duhanin.“Do të avokojmë që të bindim politikëbërësit për këtë iniciativë. Nuk ka gjë të mirë në duhan, është një ves që më vonë bëhet sport i rrezikshëm”, u shpreh Hashani.Edhe Faik Hoti nga IKSHPK rikujtoi pasojat e mëdha shëndetësore dhe ekonomike të duhanit duke theksuar se mbi 8 milionë njerëz në botë humbin jetën çdo vit nga kjo dukuri. Ai paralajmëroi për rrezikun e futjes së cigareve elektronike në përdorim nga të rinjtë.“Po ballafaqohemi me një fushatë të egër të industrisë së duhanit. Është me rëndësi që të insistojmë në zbatimin e ligjit dhe përfshirjen e produkteve të reja në kuadër të tij”, tha Hoti.Ndërsa drejtori i Onkologjisë, Ilir Kurtishi, ngriti shqetësimin për rritjen e rasteve të kancerit në mushkëri, veçanërisht tek personat e rinj. Ai theksoi rëndësinë e edukimit dhe ndërgjegjësimit si masa parandaluese.“Çdo vit kemi rreth 200 pacientë me kancer në mushkëri. Nëse nuk veprohet, situata do të bëhet edhe më problematike. Lufta më e mirë ndaj kancerit është ndalimi i duhanit”, apeloi Kurtishi.Tryeza përfundoi me thirrjen e përbashkët që institucionet, shkollat, prindërit dhe shoqëria civile të bashkëpunojnë për mbrojtjen e të rinjve nga efektet e rrezikshme të duhanit dhe produkteve të tij të reja. /Kosovatimes/