Komuna e Mitrovicës së Jugut ishte sot ndalesa e drejtuesve të Nismës Socialdemokrate të Kosovës. Kryetari i kësaj partie, Fatmir Limaj, tha se me kandidatët për Kuvendin e Komunës, partia ofron kuadro profesionale dhe të përkushtuara për qeverisje në interes të qytetarëve.
Ky subjekt politik nuk ka kandidat për kryetar në këtë komunë, por bartësi i listës për Kuvend Komunal dhe kryetari i degës së Nismës në Mitrovicë, Flamur Vojvoda, theksoi se Mitrovica meriton zhvillim, punësim dhe barazi për të gjithë.
Nisma Socialdemokrate ka vazhduar fushatën për zgjedhjet lokale në qytet, ku kryetari Limaj para përkrahësve mitrovicas theksoi rëndësinë e ndryshimit dhe përkushtimit për zhvillimin e qytetit. Ai shtoi se Mitrovica ka nevojë për një udhëheqje që i jep prioritet mirëqenies së qytetarëve, hapjes së vendeve të reja të punës dhe përmirësimit të infrastrukturës.
Limaj po ashtu theksoi se Nisma Socialdemokrate synon të ofrojë një qeverisje të përkushtuar, ku interesi i qytetarëve vendoset në rend të parë. Ai shtoi se baza e përmirësimit të jetës së qytetarëve është komuna dhe se Kosova ka nevojë më shumë se kurrë për njerëz profesionalë dhe me përvojë.
VOX: Fatmir Limaj, kryetar i Nismës Socialdemokrate
“Zëri i atyre që kanë nevojë, por nuk kanë zë, duhet të kthehet në zë të tyre. Ka mijëra pensionistë dhe njerëz në nevojë që nuk kanë zë. Ne duhet të jemi afër tyre.”
Flamur Vojvoda, bartësi i listës për Kuvend Komunal, tha se qyteti meriton zhvillim, punësim dhe barazi për të gjithë.
VOX: Flamur Vojvoda, bartës i listës së Nismës Socialdemokrate
“Mirëqenia sociale është shumë e rëndësishme. Numri i rasteve sociale në Mitrovicë është më i lartë, por ne kemi plan të gatshëm për zhvillimin ekonomik dhe ngritjen e mirëqenies në qytet.”
Drejtuesit e Nismës Socialdemokrate theksuan se përmes përfaqësimit në Kuvendin Komunal, partia do të angazhohet për të adresuar sfidat kryesore të qytetit dhe për të ndërtuar një të ardhme më të mirë për të gjithë banorët e Mitrovicës.
Nisma Socialdemokrate synon të forcojë prezencën e saj politike në Mitrovicë dhe të paraqitet para qytetarëve si një alternativë që ofron zhvillim, transparencë dhe barazi.
