Dega e Partisë Demokratike të Kosovës në Drenas ka zhvilluar sot një aksion simbolik para objektit të Komunës së Drenasit, duke vendosur shirita rrethues në shenjë proteste.
Sipas PDK-së, kjo ndërtesë është shndërruar në “vend ngjarjeje të abuzimit”. Ky aksion i PDK-së në Drenas vjen pas publikimit të një audio-incizimi ku është i përfshirë kryetari aktual i komunës, Ramiz Lladrovci.
Petrit Hajdari, kandidat i kësaj partie për kryetar të komunës dhe njëherësh ushtrues detyre i kryetarit të degës së PDK-së në Drenas, tha se ky veprim është një thirrje publike për drejtësi dhe transparencë.
“Ky akt është thirrje publike për drejtësi, për transparencë dhe për fundin e qeverisjes me pazare. Nëse kryetari në ikje e ka kthyer komunën në vend të krimit, qytetarët sot e shënuan si të tillë dhe ashtu do të mbetet derisa drejtësia të veprojë”, deklaroi Hajdari.
Ai shtoi se situata e krijuar e ka tronditur të gjithë opinionin publik në Drenas.
“Sot jemi mbledhur këtu për një çështje të rëndë që prek jetën dhe dinjitetin e qytetarëve tanë. Dy ditë më parë, opinion publik u shokua nga një audio-incizim tronditës, ku kryetari në largim i Drenasit dëgjohet duke bërë pazare me tokat e komunës, sikur të ishin pronë personale, duke llogaritur miliona përfitime nga pasuria publike”, theksoi Hajdari.
Ndërkohë, kryetari i Komunës së Drenasit, Ramiz Lladrovci, i cili synon edhe një mandat të ri në krye të kësaj komune në zgjedhjet e 12 tetorit, ka thënë dje në një konferencë për media se “nuk shantazhohet” dhe se incizimi është, siç u shpreh, i “prerë dhe i sakatuar”.
