Ministri në detyrë i Kulturës, Hajrulla Çeku, ka uruar artistin kosovar Petrit Halilaj pas fitimit të çmimit prestigjioz Nasher Prize for Sculpture 2027, një nga vlerësimet më të larta në botën e artit bashkëkohor.
“Me shumë gëzim mora lajmin se artisti ynë Petrit Halilaj është nderuar me çmimin prestigjioz Nasher Prize for Sculpture 2027, një nga vlerësimet më të larta në botën e artit bashkëkohor. Urime Petrit për këtë arritje të jashtëzakonshme, që na mbush me krenari të gjithëve”, ka thënë Çeku.
Ai ka theksuar se çmimi shoqërohet me 100 mijë dollarë, të cilat Halilaj ka vendosur t’i dhurojë për organizatën e tij “Hajde!”, e cila në bashkëpunim me MKRS është duke restauruar dhe rikthyer në jetë Shtëpinë e Kulturës në Runik.
Çeku ka përkujtuar edhe aktet e mëparshme të artistit.
“Ky akt bujarie nuk është i pari i Petritit për vendin tonë. Dy vite më parë, ai dhuroi veprën e tij të çmuar “Kur dielli perëndon, ne e ngjyrosim qiellin” për Galerinë Kombëtare të Kosovës, duke pasuruar koleksionin kombëtar me një vepër të jashtëzakonshme arti”, ka shkruar ai në Facebook.
Sipas ministrit në detyrë, kjo vepër e instaluar mbi Hotelin Grand vazhdon të mbetet një simbol që i jep hijeshi e frymë Prishtinës.
“Shpreh mirënjohjen time të thellë për këtë kontribut dhe për krenarinë që një artist nga Kosova nderohet me një çmim kaq të lartë ndërkombëtar. Ky sukses është një dëshmi e fuqisë së historive që lindin nga vendi ynë dhe që prekin botën”, ka shtuar Çeku.
