“Arterie vendimtare për qarkullimin e lirë”, e ka quajtur kryeministri në detyrë, Albin Kurti rrugën ndërkufitare mes Kosovës e Shqipërisë që u përurua sot, mes fshatrave Gorozhup të Hasit të Prizrenit e Pogaj të Hasit të Shqipërisë, projekt ky në kuadër të marrëveshjeve të nënshkruar ndërmjet Kosovës dhe Shqipërisë.
Të pranishëm në këtë ceremoni përurimi, përveç kryeministri në detyrë, ishin edhe ushtruesi i detyrës së ministrit në detyre të Mjedisit, Planifikimit Hapësinor dhe Infrastrukturës, Hysen Durmishi, ambasadori i Shqipërisë në Kosovës, Petrit Malaj, prefekti i Qarkut të Kukësit, Dritan Baji, kryetari i Bashkisë Has, Miftar Dauti, e deputetë të dyja Kuvendeve nga Kosova e Shqipëria
Kurti tha se përurimi i kësaj rruge është i rëndësishëm për banorët e kësaj zone, por edhe për turizmin malor e kulturor, të dy republikave.
“Kjo është një pjesë e vogël e borxhit të madh që kemi ndaj këtij komuniteti, që i ka dhënë shumë edhe zhvillimit ekonomik edhe historisë sonë kombëtare”, tha kryeministri Kurti, derisa shtoi se pas përfundimit të rrugës Kërstec-Pakishtë-Zapot, e cila ishte me vlerë prej 2.6 milionë euro, kjo rrugë që inauguruan sot, Gorozhup-Pogaj kap vlerën afër 1 milion euro që ka gjatësi prej 3.7 kilometra.
Kryeministri në detyrë, tha se lidhja me Shqipërinë, përveç se historike e shpirtërore, duhet të jetë edhe fizike, e pikërisht kjo rruga e inauguar sot, sipas tij, është një dëshmi për hapat konkretë në drejtimin e duhur.
Ndërkaq, ushtruesi i detyrës së ministrit në detyrë të Mjedisit, Planifikimit Hapësinor dhe Infrastrukturës, Hysen Durmishi, tha se para dy vitesh është nënshkruar protokolli i marrëveshjeve për tri rrugë, rrugën Kërstec-Pakishtë-Zapot, rryga që u përrua sot si dhe rruga Dobrunë-Blinishtë, e cila tha se ka qenë pjesë e kësaj marrëveshje.
Ndërkaq, ambasadori i Shqipërisë, Petrit Malaj, tha se inaugurimi i kësja rruge hap një kapitull të ri në dobi të kombit.
Kryetari i Bashkisë Has, Miftar Dauti, tha se Hasi ka plotësuar ëndrrën disavjeçare, bashkimin e trojeve hasjane.
